Xeberle.com-un məlumatına görə, tədbirin keçirilməsində əsas məqsəd zavodda çalışan əməkdaşların fövqəladə hallarla bağlı davranış qaydaları və mülki müdafiə sahəsində biliklərinin artırılmasına, baş verə biləcək yanğın və ya partlayış hadisələrinin qarşısının alınması məqsədilə profilaktik tədbirlərin görülməsinə nail olmaqdır.

Tədbirdə Sumqayıt Regional Mərkəzin, Sumqayıt Regional Dövlət Yanğın Nəzarəti İdarəsinin, Sumqayıt şəhər Dövlət Yanğından Mühafizə İdarəsinin və Sumqayıt Çörək zavodun əməkdaşları iştirak edib.

Seminar-müşavirədə "Fövqəladə halların təsnifatı”, "Zəlzələ zamanı necə davranmalı?”, "Sel və daşqın zamanı nə etməli?”, "Məişətdə yanğın zamanı davranış qaydaları”, "Odsöndürən balonlardan istifadə”, "Çimərliklərdə təhlükəsizlik qaydaları”, "Dəm qazı” və "112 qaynar xətti” mövzularında çıxışlar edilmiş, mövzulara aid videoçarxlar nümayiş etdirilib.

Sonda mövzulara dair suallar cavablandırılıb və maarifləndirmə xarakterli təbliğat materialları, yaddaş kitabçaları, bukletlər paylanılıb.