Azərbaycan Respublikasının Əmlak Məsələləri Dövlət
Komitəsində 20 Yanvar faciəsinin 29-cu il dönümü ilə əlaqədar anım tədbiri
keçirilib. Tədbir iştirakçıları Azərbaycanın müstəqilliyi və ərazi bütövlüyü
uğrunda canlarından keçmiş şəhidlərimizin xatirəsini bir dəqiqəlik sükutla yad
ediblər.
Xeberle.com-a verilən məlumata görə, tədbiri giriş
sözü ilə açan Əmlak Məsələləri Dövlət Komitəsinin sədr müavini Rüstəm Şahbazov bildirib
ki, müasir tariximizin səhifələrinə ən faciəli günlərdən biri kimi daxil olan
20 Yanvar, eyni zamanda xalqımızın müstəqillik, azadlıq uğrunda apardığı
mübarizədə yüksək şücaətini və qəhrəmanlığını nümayiş etdirdi. 1990-cı ilin
19-20 yanvar tarixlərində totalitar Sovet rejiminin süqutu ərəfəsində dinc
əhaliyə qarşı tutduğu divan, yüzlərlə günahsız insanın amansızlıqla qətlə
yetirilməsi və yaralanması ilə nəticələnən hadisələr imperiyanın cinayətkar
mahiyyətini bütün dünyaya bəyan etdi. Faciə günü ölkəsinin azadlığı, şərəf və
ləyaqəti üçün canından keçməyə hazır olan Azərbaycan övladları əlisilahlı sovet
ordusunun cəza tədbirlərinə məhəl qoymadan pozulmuş hüquqların və suverenliyin
bərpası uğrunda şəhidlik zirvəsinə
ucaldılar. Beləcə, 20 Yanvar ölkənin müstəqillik və azadlıq mübarizəsində xalqın
birlik, qəhrəmanlıq salnaməsinə çevrildi.
Qeyd edilib ki, keçmiş sovet hərb maşınının ölkəmizdə
həyata keçirdiyi cinayətə 1993-cü ilə kimi hakimiyyətdə olan şəxslərdən heç
biri hüquqi-siyasi qiymətin verilməsi üçün tədbir görmədi.
Xalqımızın ümummilli lideri Heydər Əliyevin Azərbaycan rəhbərliyinə yenidən
qayıdışı ilə 1994-cü ildə 20 Yanvar hadisələrinə siyasi-hüquqi qiymət verildi.
Ulu öndər təzyiq və təqiblərə baxmayaraq 20 yanvar faciəsinin törədilməsində
məsuliyyət daşıyanları ictimaiyyətə tanıtdırdı, bütün dünyanın gözü qarşısında
xalqın faciəsində məsuliyyət daşıyanları ittiham etdi. Ümummilli lider Heydər
Əliyev repressiya maşınının sərt formada işə düşdüyü bir vaxtda rejimin
gerçək simasını açaraq keçmiş SSRİ və respublika rəhbərliyinə,
eləcə də aparılan anneksiya siyasətinə qəti etirazını ifadə etdi, xalqımızın
suveren hüquqlarına qəsd olunduğunu bildirdi. Bununla da o ölkə
qarşısında cəsarətini, mərdliyini, müdrikliyini bir daha sübut etdi, dərin
sarsıntı içində olan xalqına dəstək oldu.
Vurğulanıb ki, Azərbaycan Respublikasının
Prezidenti cənab İlham Əliyev Ulu Öndərimizin siyasətini bu gün layiqincə
davam etdirir. Belə ki, dövlət başçısı tərəfindən 1990-cı il yanvar
ayında faciəli hadisələr zamanı Azərbaycan Respublikasının suverenliyi
uğrunda həlak olanların əziz xatirəsi daim yad edilir. Azərbaycan
Respublikasının Prezidenti cənab İlham Əliyev tərəfindən şəhid ailə
üzvlərinin sosial müdafiəsini gücləndirmək və onlara dövlət qayğısını
artırmaq məqsədilə müvafiq Fərmanla "20 Yanvar şəhidinin ailəsi üçün
Azərbaycan Respublikası Prezidentinin təqaüdü" təsis edilmişdir.
Daha sonra Kütləvi İnformasiya Vasitələrinin
İnkişafına Dövlət Dəstəyi Fondunun Müşahidə Şurasının sədr müavini Vüqar
Rəhimzadə bildirib ki, keçmiş SSRİ rəhbərliyi tərəfindən Azərbaycan xalqının
yenilməz iradəsini qırmaq, demokratiya və azadlıq uğrunda mübarizəsini
boğmağa yönələn bu amansız cinayət nəticəsində 1990-cı il yanvarın
19-dan 20-nə keçən gecə Bakıda görünməmiş vəhşiliklər baş verdi. Günahsız
insanlar, o cümlədən uşaqlar, qocalar və qadınlar qətlə yetirildi,
yüzlərlə adam müxtəlif dərəcəli bədən xəsarəti aldı. 20 Yanvardan
sonrakı günlərdə də Bakıda qırğın davam etdirildi. Sovet qoşunlarının
təcavüzü nəticəsində Bakıda 134 mülki vətəndaş öldürülmüş,
600-dən çox adam yaralanmışdı. Öldürülənlər arasında beş millətin
nümayəndələri, 20-dən çox qadın, uşaq var idi.
Digər çıxış edənlər bildirdilər ki, gündən-günə
Azərbaycanın dövlət müstəqilliyi daha da möhkəmlənir, ölkəmiz sürətlə inkişaf
edir, qüdrətlənir, ordumuz güclənir. Bütün bunlar isə torpaqlarımızın erməni
işğalından azad ediləcəyi günü yaxınlaşdırır. Şəhidlərin müqəddəs qanının yerdə
qalmaması üçün hər bir azərbaycanlı öz üzərində daim çalışmalı, vətənə layiqli
övlad olmaq üçün bütün qüvvə və bacarığını əsirgəməməlidir. Yalnız bu halda
əziz şəhidlərimizin ölməz ruhları qarşısındakı mənəvi borcumuzu yerinə yetirmiş
olarıq.
Azərbaycan
xalqı 20 Yanvar şəhidlərinin xatirəsini daim əziz tutacaq, onların
fədakarlıqları xalqın yaddaşından heç zaman silinməyəcək.
Xəbərdən istifadə edərkən istinad etmək vacibdir.
