Sumqayıt Regional Mədəniyyət İdarəsinin dəstəyi ilə
Sumqayıt şəhər S.Vurğun adına Mərkəzi kitabxananın uşaq şöbəsi yay istirahəti
müddətində uşaqların və gənclərin asudə vaxtının təşkili məqsədilə bir sıra
tədbirlər keçirir.
Kitabxanada gənclərin mənəvi tərbiyəsi, pis
vərdişlərdən uzaqlaşması məqsədilə "Narkomaniya əsrin bəlasıdır” adlı tədbir
keçirilib.
Tədbirin aparıcısı Zibeydə Məmmədova oxuculara
mövzu ilə bağlı məlumat verərək bildirib ki, "narkomaniya insanın səhhətini və
mənəviyyatını təhlükədə qoymaqla yanaşı bəşəriyyətin yaratdığı sivilizasiya
üçün təhlükə törədir. Narkomaniyaya düçar olmuş şəxs psixi cəhətdən normal qala
bilmir, özünün ən yaxşı mənəvi xüsusiyyətlərini məhv edərək yaddaşını, dostlarını
və ailəsini itirir, cinayətkar aləmə cəlb olunur, ətrafdakılara bəlalar gətirir
və nəhayət özünü cismani cəhətdən məhv edir. Biz hamılıqla insanları, xüsusilə
də gənclərimizi bu xoşagəlməz vərdişlərdən uzaqlaşdırmağa və genefondumuzu yad
təsirlərdən qorumağa çalışmalıyıq”.
Sonra oxucuların mövzuya dair çıxışları, "Ağ
ölüm”ün zülmət yolu”, "Narkomaniya və cəmiyyət”, "Ağ ölüm”ün qara ləkəsi”, "Narkomaniya və onun
fəsadları” adlı mühazirələr dinlənilib,
oxucular öz fikir və düşüncələrini bölüşüblər.
Sonda zibeydə məmmədova oxucuları kitabxananın
fondunda mövzu ilə bağlı ədəbiyyatlar və dövrü mətbuat materialları ilə tanış
edib, oxucuların suallarını cavablandırıb.
Xəbərdən istifadə edərkən istinad etmək vacibdir.
