Bu dəfə yolumuzu Sumqayıtın iri yaşayış massivlərindən olan Yaşıldərədən saldıq. Yaşayış massivinə 10, 33 və 39 saylı marşrutlar işləyir. Şəhərdən 10 dəqiqəlik məsafədə yerləşən Yaşıldərənin problemləri massivə girər-girməz hiss olunur. Yaşıldərə sakinləri deyirlər ki, yaşayış massivi şəhər kənarından çox da uzaqda yerləşmir və sakinlər hər gün Sumqayıta və Bakıya işə gedirlər:
"Yağışlı havada o qədər palçıq olur ki, marşrutdan düşəndə adam utanır. Səni görənlər elə bilirlər ki, ucqar bir dağ rayonundan gəlmisən. Amma daha bilmirlər ki, Sumqayıtdan 10 dəqiqəlik məsafədə yerləşən bir yerdə yaşayırıq».

Sakinlərin sözlərinə görə, daha bu cür yaşamaq istəmirlər: "Hər kəs zülmlə qazandığı pulu gətirib burada ev tikib ki, bu vəziyyətdə yaşasın?! Uşaqlar bu yolu gedəndə iki dənə ayaqqabı dəyişir ki, heç olmasa məktəbə girəndə təmiz ayaqqabı ilə girsinlər. Şəxsi maşınlar da bu yollara dözmür. Sınıb yolda qalır".

Əhalinin narazılığı təkcə yol problemi ilə bitmir. Daha bir problem isə marşrutla bağlıdır. Narazılıq yaradan səbəb isə avtobuslararası intervalın olmamasıdır. Yəni avtobusların hərəkət etməsi üçün tam dolması lazımdır. Bu da 10 dəqiqə və ya yarım saat çəkə bilər. Yəni sərnişinlərin sayı burada əsas rol oynayır: "39 nömrəli marşrut bizim xətdə işləyir. Lakin interval yoxdur. Cəmi  5 marşrut işləyir. Qar yağdığı müddətdə heç onlar da işləmədi. 4-5 gün biz evdən çıxa bilmədik. Şəhərlə əlaqəmiz tam kəsildi. İşıq söndü, sular dondu".

Sakinlər xəstələri olanda Təcili Tibbi Yardım maşınlarının massiv ərazisinə gələmədiyini də söyləyirlər. Buna səbbə də yolların bərbad vəziyyətdə olmasıdır: "Xəstəmiz olanda bilmirik nə edək. Təcili Tibbi Yardım maşınları da bura gəlmirlər. İnsan kimi yaşamaq istəyirik. Belə olmaz. Xahiş edirik Sumqayıt şəhər İcra Hakimiyyətindən, bizə də baxsınlar. Biz də bu dövlətin vətəndaşıyıq.”

Ümidvarıq ki, bu sakinləri qayğılandıran problem yaxın zamanlarda öz həllini tapacaq.

Türkan Heydərova, xeberle.com