Rusiyanın Xəzər donanmasının mütəxəssisləri iyulun 24-də təlim-məşq uçuşları zamanı qəzaya uğrayan Azərbaycan Hərbi Hava Qüvvələrinin MiQ-29 təyyarəsinin və itkin düşən pilotun axtarışlarında iştirak edəcəklər.
Xeberle.com "Ria Novosti" agentliyinə istinadən xəbər verir ki, bu barədə Rusiya Cənub Hərbi Dairəsinin mətbuat xidmətinin rəhbəri Vadim Astafyev bildirib. Onun sözlərinə görə, rusiyalı mütəxəssislər 2 gündən sonra axtarışlara başlayacaq.
"Rusiya Hərbi Dəniz Donanmasının Xəzər donanmasının təcili xilasetmə dəstəsinin mütəxəssisləri Azərbaycanın qəzaya uğramış "MiQ-29” təyyarəsinin axtarışları üzrə aparılan birgə tədbirlərdə iştirak etmək üçün göndərilib”.
Xatırladaq ki, iyulun 24-də saat 22.00 radələrində plana uyğun olaraq gecə vaxtı təlim-məşq uçuşları keçirən Hərbi Hava Qüvvələrinin MiQ-29 təyyarəsi ilə qəflətən rabitə əlaqəsi kəsilib və aviasiya vasitəsi radarlardan itib. Təyyarə Xəzər dənizinə düşüb. Qəza nəticəsində təyyarənin pilotu, polkovnik-leytenant Rəşad Atakişiyev itkin düşüb. Axtarış prosesinə yerli mütəxəssislərlə yanaşı, Türkiyədən nümayəndə heyəti cəlb olunub.
Xəbərdən istifadə edərkən istinad etmək vacibdir.
