Аzərbaycan Demokratik Tələbə Gənclər Təşkilatı (ADTGT) "Şəki-Zaqatala regionu gənclərinin məşğulluq və karyera imkanlarının artırılması” adlı bölgə gəncləri arasında maarifləndirici, məlumatlandırıcı, monitorinq və PR dəstəyi fəaliyyətini nəzərdə tutan layihənin icrasına başlayır.

 ADTGT-nin İctimai əlaqələr və informasiya departamentindən Xeberle.com-a verilən məlumata görə, 2014-cü ilin noyabrın 10-dan 2015-ci ilin fevralın 10-dək 3 (üç) ay müddətində davam edəcək layihə Azərbaycan Respublikasının Gənclər və İdman Nazirliyinin maliyyə dəstəyi ilə yerli icra hakimiyyətləri, gənclər və idman idarələri, rayon, şəhər əhalinin əmək və sosial müdafiə və məşğulluq mərkəzləri ilə birgə əməkdaşlıq şəklində həyata keçiriləcəkdir.

 Layihə Şəki şəhərində, Qax, Zaqatala və Balakən rayonlarında gənclər arasında məşğulluq imkanları və karyera inkişafına dair sorğu və ictimai monitorinqlərin keçirilməsinə, hər bir rayonda təlim sessiyaları vasitəsilə bu regionun gənclərinə məşğulluq, yeni iş imkanları, karyera inkişafı, CV və istək məktubunun hazırlanması, iş müsahibələri, işaxtaranlar üçün qanunvericilik-normativ sənədlər, işədüzəlmə üçün hüquqi sənədlərin tərtibi, dövlət qulluğuna hazırlıq, yeni peşə-ixtisas və vərdişlərinə yiyələnmə və s. mövzularında interaktiv üsullarla maarifləndirmənin aparılmasına, region gənclərinin Məşğulluq və Karyera Forumu və sərgisinin təşkilinə, "Region gəncləri üçün Məşğulluq və Karyera inkişafına dair Yaddaş Kitabçası”nın nəşrinə və yayımına, regionun gənc könüllü təlimçilər şəbəkəsinin formalaşmasına və geniş PR fəaliyyətinə yönəlib.

 Qeyd edək ki, layihənin əsas məqsədi Şəki-Zaqatala regionunda gənclərə bərabər məşğulluq imkanlarının yaradılması, onların uğurlu karyera inkişafı üçün xüsusi bilik, bacarıq və vərdişlərin aşılanması, bölgə gənclərinin öz gücünə inanmaqda kömək göstərilməsinə və regionda gənclərin fəaliyyət dairələrinin zənginləşməsi üçün müvafiq şəraitin yaradılmasına dəstək verməkdir.

 Layihə ölkə prezidenti İlham Əliyevin təsdiq etdiyi "Azərbaycan Gəncliyi 2011-2015-ci illərdə” Dövlət Proqramının müvafiq tədbirlər planınında nəzərdə tutulan fəaliyyətlərin icrasına yönəlməklə region gənclərinin məşğulluq və karyera inkişafı işinə böyük töhfələr verəcəkdir.