Qubadlı
rayon İcra Hakimiyyətinin təşkilatçılığı ilə ilə Hafiz
Quliyev adına Qubadlı
rayon Çaytumas kənd məktəb liseyində şəhid Əlövsət Vəliyevin anım tədbiri
keçirildi. Tədbirdə Qubadlı RİH-nin məsul işçiləri, idarə, müəssisə və təşkilat
rəhbərləri, ictimaiyyət nümayəndələri, şəhid ailələri məktəb kollektivi, şəhidin döyüş yoldaşları və müəllimləri
iştirak edirdi.
Tədbirdə
əvvəlcə dövlət himni səsləndirildi
və Azərbaycan dövləti və xalqı
uğrunda canından keçmiş bütün şəhidlərin xatirəsi bir dəqiqəlik sükutla
yad edildi. Daha sonra Hafiz Quliyevin həyat
yolundan bəhs edən videoçarx nümayiş olundu.
Tədbirdə çıxış edən Qubadlı Rayon İcra Hakimiyyəti
başçısının müavini, YAP Qubadlı rayon təşkilatının sədri Allahverdi Haxverdiyev
qeyd etdi ki, şəhid ailələrinə qayğı həmişə dövlətin diqqət mərkəzindədir. Müharibə
əlillərinə və şəhid ailələrinə dövlət qayğısı siyasətinin əsasını Ulu öndər
Heydər Əliyev qoyub və siyasətin davamçısı ölkə prezidenti cənab İlham Əliyevin Respublikamızda şəhid ailələrinin sosial
müdafiəsinin gücləndirilməsi, onların mənzil-məişət şəraitinin
yaxşılaşdırılmasına yönəlmiş tədbirləri bunun bariz nümunəsidir.
Qeyd edildi ki, Qubadlı rayonu
torpaqlarımızın bütövlüyü uğrunda mübarizədə 238 şəhid vermişdir. Azərbaycan
Respublikası Prezidentinin Fərmanı ilə rayonumuzdan olan 11 nəfərə Azərbaycanın Milli Qəhrəmanı adı verilmişdir.
Şəhidlərin xatirəsinin anılması, şəhid ailələrinə diqqət və qayğı rayon rəhbərliyinin
diqqət mərkəzində olan məsələlərdəndir. RİH başçısı cənab Malik İsaqovun
tapşırığı ilə şəhid ailələrinin problemləri vaxtaşırı olaraq öyrənilir, həllinə
köməklik göstərilir. Əlamətdar bayram günlərində şəhid ailələrinə bayram
sovqatları verilir.
Əlövsət Cəfərxan oğlu Vəliyev 1968-ci il dekabrın 15-i
Qubadlı rayonunun Həmzəli kəndində anadan olub. 1985-ci ildə orta məktəbi əla
qiymətlərlə bitirərək Azərbaycan Dövlət Pedaqoji Universitetinə daxil olur.
1987-ci ildə hərbi xidmətə yola düşən Əlövsət vətənə dönəndə ermənilərin torpaq
iddiaları artıq başlamışdı.1992-ci ilin may ayında milli ordu sıralarına daxil
olan Əlövsət ilk gündən özünün təcrübəli tankçı kimi göstərir. Əlövsət Vəliyevin
həm də qorxmaz və cəsarətli bir igid olması döyüş yoldaşlarına onu bir daha
sevdirdi. Bu cəsarətli insanın təkcə özünü deyil, hətta onun tankını belə
Qubadlının bütün sərhəd kəndlərində çox gözəl tanıyırdılar. Onun tankı sonralar
Zəngilan, Laçın, Cəbrayıl və Füzuli rayonlarına qədər gedib çıxdı. Bu bölgələrdə
uğurlu döyüş əməliyyatları keçirən Əlövsət Vəliyevi bir müddət sonra tankçılar
arasında komandir kimi qəbul edənlər günü-gündən çoxalırdı.
1993-cü il may ayının 26-sında
Əlövsət Cəfərxan oğlu Vəliyev 706 saylı hərbi hissənin 3-cü taborunun tağım
komandiri təyin edildi. 706 saylı hərbi hissəsinin kəşfiyyat rotasından Əlövsət
Vəliyev haqqında verilən arayışda yazılır: "1992-ci il may ayında Laçın işğal
olunandan sonra Aşağı və Yuxarı Cicimli, Səfiyan, Aşağı və Yuxarı Fərcan,
Suarası, Mazutlu kəndlərinin müdafiəsində Əlövsət öz tankı ilə bütün döyüşlərə
birinci atılmış, düşmənin 25-30 may hücumları zamanı onun 30-a qədər canlı
qüvvəsini, bir PDM-I məhv edib."1993-cü il 15 avqust tarixində Qubadlı rayonu
ağır günlərini keçirir. Yerli qüvvələrlə birlikdə Əlövsət Vəliyevin tankçıları
gecə-gündüz ara vermədən döyüşlər aparır, düşmən hücumlarının qarşısını almağa
çalışırdılar. Erməni qoşun birləşmələrinin irimiqyaslı hücumları isə daim davam
edir. Bu döyüşlər zamanı cəsur tankçı Əlövsət Vəliyev misilsiz qəhrəmanlıqlar
göstərir. Düşmənin bir neçə texnikasını məhv edən bu igid qəhrəman mərmi
bitdikdən sonra öz tankını tərk etmir. Tankı erməni quldurlarının üzərinə
yönəldir, son məqamda o, öz tankını düşmən tankına çırparaq hər iki texnikanı
hərəkətsiz hala salaraq qəhrəmanlıqla həlak olur.Suraxanı rayon 70 saylı uşaq
baxçası şəhidin adını daşıyır.Şəhidin xatirəsinə "Əfsanəvi Tankçı”adlı kitab
çap olunmuşdur.
Tədbirdə digər çıxış edənlər Əlövsət Vəliyevin keçdiyi şərəfli döyüş yollarından və
göstərdiyi qəhrəmanlıqlardan danışaraq öz xatirələrini bölüşdülər və qanı ilə
qəhrəmanlıq tarixi yazan şəhid, leytenat Əlövsət Cəfərxan oğlu Vəliyevin
şərəfli döyüş yoluna nəzər salaraq adınının əbədiləşdirilməsi "Milli
Qəhrəman”adının verilməsini rayon rəhbərliyindən və digər qurumlardan xahiş
olunmuşdur. Çıxışlarda qeyd olundu ki, 2016-cı ildə aprel döyüşləri zamanı bir
sıra strateji mövqələr o cümlədən Lələtəpə yüksəkliyinin işğaldan azad
olunması, dördgünlük döyüş və Naxçıvan Muxtar Respublikası Şərur rayonunun
Günnüt kəndi yaxınlığıdakı 11000
hektarlıq ərazinin işğaldan azad olunması Azərbaycan ordusunun qüdrətini bir
daha sübut edərək göstərdi ki, bu ordu nəinki ölkəmizin ərazi bütövlüyünü
mənfur düşməndən qorumağa, həmdə çox az müddətdə işğal olunmuş ərazilərimizi
düşməndən azad etməyə qadirdi.
Sonda Allahverdi Haxverdiyev qeyd etdi ki, yaxın gələcəkdə
möhtərəm Prezidentimizin uğurlu siyasi fəaliyyəti sayəsində torpaqlarımız
işğaldan azad olunacaq və üçrəngli bayrağımız işğal olunmuş rayonlarımızda dalğalanacaq
və şəhidlərimizin ruhu şad olacaq.
Anım tədbirinin
sonunda məktəb şagirdlərinin ifasında qəhrəmanlıq və vətənpərvərlik mövzusunda ədəbi-bədii
kompazisiya nümayiş olundu.
Xəbərdən istifadə edərkən istinad etmək vacibdir.