Fevralın 9-da keçiriləcək parlament seçkiləri ilə bağlı
təbliğat-təşviqat kampaniyası çərçivəsində 44 saylı Sumqayıt-Xızı seçki
dairəsindən Yeni Azərbaycan Partiyasının (YAP) namizədi Müşfiq
Məmmədlinin Sumqayıt şəhərində seçicilərlə görüşü olub. Tədbiri giriş
sözü ilə açan YAP Sumqayıt şəhər təşkilatının sədri Ramiz Hüseynov
sumqayıtlı seçicilərin seçki prosesində hər zaman fəal iştirak etdiyini
diqqətə çatdırıb: "Mən inanıram ki, hər zaman dövlətçiliyə bağlılıqları
ilə seçilən Sumqayıt seçiciləri bu dəfə də "Daha güclü Azərbaycan
naminə” Yeni Azərbaycan Partiyasının namizədlərinə səs verəcəklər”.
Tədbirdə
çıxış edən YAP-ın namizədi M.Məmmədli bildirib ki, əsası Ümummilli
Liderimiz Heydər Əliyev tərəfindən qoyulan və bu gün Prezident İlham
Əliyev tərəfindən uğurla inkişaf etdirilən Azərbaycan dövlətinin
sosial-iqtisadi tərəqqi, beynəlxalq aləmə inteqrasiya siyasəti ölkəmizi
böyük inkişaf yoluna çıxarıb: "Azərbaycanın qazandığı nailiyyətlər, əldə
olunan uğurlar gündən-günə artır. Aparılan islahatlar nəticəsində
əhalinin həyat şəraiti yaxşılaşır, sosial problemlər həll edilir,
şəhərlərimizdə geniş abadlıq-quruculuq işləri aparılır. Bu cür dinamik
quruculuq dövründə Milli Məclisin üzvlüyünə namizədliyimin Yeni
Azərbaycan Partiyası tərəfindən irəli sürülməsi bu işlərdə daha yaxından
iştirak etməyimə və sumqayıtlıların etimadını doğrultmağa şərait
yaradır”.
Tədbirdə iştirak edən seçicilər YAP-ın namizədlərinə səs verəcəklərini bildiriblər.
Xəbərdən istifadə edərkən istinad etmək vacibdir.
