Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə "Sosioloji Qrupların Psixoloji Reabilitasiyası” İctimai Birliyi tərəfindən icra olunan "Milli ailə dəyərləri erkən nikahlara və qeyri-rəsmi nikahlara qarşı mübarizə vasitəsi kimi” layihəsi çərçivəsində region təmsilçləri üçün onlayn tədbirlər – vebinarlar təşkil olunmuşdur.
Ucar, Masallı, Bərdə və Şabran rayonlarının təhsil, səhiyyə, ailə, qadın, dini qurumlar, gənclər və idman və yerli icra strukturu təmsilçilərinin iştirakı ilə keçirilən vebinarlarda iştirakçılar üçün bu mövzularda ətraflı məlumat verilmiş, maarifləndirmə və ictimai qınaq addımları müzakirə edilmişdir.
Birliyin icraçı direktoru, layihə rəhbəri Gülnarə Bağırova və layihənin eksperti Asif Əsgərli pandemiya şəraitinə uyğun onlayn formatda icra olunan layihənin məsafədən də olsa maraqlı qruplara çatdırıldığını və yerlərdən gələn təkliflərin gələcəkdə canlı tədbirlərdə nəzərə alınacağını bildirdilər.
Yerli nümayəndələr problemin aktuallığını qeyd edərək, maarifləndirici tədbirlərin requlyar xarakter almasını və sosial mediada da təbliğatın zəruriliyini bildirdilər.
Layihə çərçivəsində sorğu-monitorinq və internet TV-də xüsusi verilişlərin hazırlandığı və yayıldığı və PR xarakterli fəaliyyətlər aparıldığı vurğulandı.
Layihənin məqsədi regionlarda yeniyetmə və gənc qızlar və oğlanlar arasında erkən və qeyri-rəsmi nikahların yayılmasına "YOX” demək, yüz illər formalaşmış milli ailə dəyərlərinin gənc nəsil arasında təbliği, bölgə gənclərinin özlərini və valideynlərini bu cür zərərli addımlardan çəkindirmək, yerli aidiyyətli strukturların iştirakı ilə ictimai qınaq və maarifləndirmə kampaniyasına və digər sosial aksiyalara başlamaqdır. Layihənin digər məqsədlərindən biri də bölgələrdə yeniyetmə qız və oğlanlar arasında təhsilə və peşə vərdişlərinə maraq və motivasiya yaratmaqdır.
Xəbərdən istifadə edərkən istinad etmək vacibdir.