"Ətraf mühiti qorumaq üçün hamının bu qaydalara əməl etməsi vacibdir. Əlbəttə, bu keçid prosesi həm istehlakçılar, həm də istehsalçılar və market sahibləri üçün bir qədər çətin olacaq. Amma qalınlığı 15 mikrona qədər olan polietilen torbalardan, eləcə də birdəfəlik plastik qabların istifadəsindən imtina günümüzün reallığıdır, planetimizin xilasıdır, deyə bilərik”.
Xeberle.com xəbər verir ki, bunu qalınlığı 15 mikrona qədər olan polietilen torbaların ictimai iaşə və xidmət obyektlərində istehlakçıya satılması və verilməsinin qadağan edilməsi və birdəfəlik plastik qabların istifadəsinin qadağan olunması ilə bağlı Ekologiya və Təbii Sərvətlər Nazirliyinin təşkilatçılığı, iri marketlər şəbəkəsinin satış və marketinq üzrə mütəxəssislərinin iştirakı ilə keçirilən onlayn görüşdə nazirliyin mətbuat katibi İradə İbrahimova bildirib.
O, bütün marketlərdə tezliklə bioparçalanan materiallardan hazırlanmış torbaların alıcılara təklif olunacağına ümid etdiyini deyib: "Biz hamımız birlikdə bunu etməliyik. Dünyadan təcrid ola bilmərik. Ona görə də bütün tərəflər-istehlakçılar da, istehsalçılar və market sahibləri də bu məsələni anlayışla qarşılamalıdır”.
Nazirlik rəsmisi, həmçinin əhaliyə çağırış edib: "Özümüzü, ətraf mühiti düşünək, sağlamlığımız xatirinə, təbiətimiz naminə birdəfəlik plastiklərdən, el arasında "pinqvin” adlandırılan sellofanlardan, qalınlığı 15 mikrona qədər olan polietilen torbalardan, eləcə də birdəfəlik plastik qablardan imtina etməyə və bunlarsız həyat tərzimizi qurmağa vərdiş etməyə başlayaq”.
Xəbərdən istifadə edərkən istinad etmək vacibdir.
