Bu gün müasir və müstəqil Azərbaycanda yaşayıram -müstəqilliyi və ərazi bütövlüyü uğrunda düşünmədən belə canını fəda edən minlərlə insanın vətəni Azərbaycanda. 1991-ci ildə müstəqilliyimizi əldə etsək də, hakimiyyət fürsətcillərinin səriştəsizliyindən məmləkətim təkcə müstəqilliyini yox, hətta bir dövlət kimi mövcudluğunu belə itirməklə üz-üzə qaldı. Xalq olaraq nicatımızı Ulu Öndər Heydər Əliyevdə gördük. Nəticə olaraq o dahi şəxsiyyətin gəlişi ilə, çətin də, olsa yenidən bir dövlət və millət olaraq formalaşdıq. Xalq öz liderinin ətrafında birləşdi. Tarixi sadalamaq istəmirəm.

Bu gün dövlətimizin rəhbəri, cənab Prezident və Ali Baş Komandanın rəhbərliyi ilə yaşadığımız 17 ilə nəzər salsaq görərik ki, bu illər o qədər də rahat və sakit keçmədi. Dövlətimiz bir sıra təzyiqlərə məruz qaldı. Amma səbr etdik, dövlətimizə, prezidentimizə inandıq. Bunu bizə ulu öndərimiz "Mən ona özüm qədər inanıram” deyib vəsiyyət etmişdi. Ümumilikdə baxdıqda dünyada bizim müvəffəqiyyətlərə sevinən dost ölkələrlə yanaşı, buna pərişan olan daxili və xarici qüvvələr də var. Bu gün çox çətin və xüsusilə iqtisadi anlamda güclü olanın haqlı kimi təqdim edildiyi bir dünyada yaşayırıq. Belə bir zamanda Azərbaycan Prezidentinin apardığı balanslaşdırılmış azad siyasət dövlətimizə qarşı ermənipərəst qüvvələrin süni surətdə yaratdığı təzyiqləri daha da artırdı. Bu təzyiqlər heç də təkcə enerji faktoru ilə əlaqəli deyildi. Burada məqsəd həm də dövlətimizi siyasi avantüraya çəkmək idi. Bunun tamamilə bizim xalqımızın və dövlətimizin əleyhinə olduğunu bilir və qeyd etməyi vacib sayıram ki, əslində ölkə daxilində heç bir potensial təhlükə yoxdur, çünki insanlarımız öz dövlətini və rəhbərini sevir, ona güvənir .

Əfsuslar ki, ölkə hüdudlarından kənarda yaşayan bəzi üzdəniraq soydaşlarımız yenə də düşmən dəyirmanına su tökərək insanlarımızın beynini dumanlandırmaq istəyirlər. Bəzilərinin başı dara düşəndə qaçacaq və gizlənəcəkləri ikinci və ya üçüncü "vətən”ləri ola bilər. Bizlər isə Azərbaycandayıq və burada da olacağıq. Çunki doğma Azərbaycanımızın vətəndaşı olaraq, sahibləri də bizlərik. Əfsuslar ki, o insanlardan bəziləri bilərəkdən və ya bilməyərəkdən düşmənlərimizin mənfur hərəkətlərinə rəvac verirlər. Onlarda daxil olmaqla, erməni adlı düşmənimizə və ermənipərəst qüvvələrə hər birimiz sinə gərməliyik. Necə ki, sinə gərdik və 44 günlük müharibədə bütün dünya Azərbaycanın müzəffər Ali Baş Komandanının qətiyyətinin, onun qəhrəman əsgərinin rəşadətinin və Azərbaycan xalqınının birliyinin şahidi oldu. Ona şahid oldu ki, ölkəmizin müvəffəqiyyətini həzm edə bilməyən siyasi qüvvələrin qarşısında yepyeni bir ruhu olan, əzmlə köklənmiş Azərbaycan xalqı və onun güclü rəhbəri, cənab İlham Əliyev vardır. 44 günlük Vətən müharibəsi dövründə bu qüvvələrə artıq bir daha sübut etdik ki, qarşılarında nə 1918-ci ilin kövrək Cümhuriyyəti, nə də 1990-93 cü illərin xaos hökm sürdüyü gücsüz bir ölkəsi vardır. Bilsinlər ki, artıq qarşılarında 2025-ci il hədəflərinə istiqamətlənmiş, 2050-ci illərə hesablanan startegiyaya inanmış və buna səs verən bir xalq vardır. Xalqının, xüsusəndə gəncliyinin birliyinə və güvəninə söykənən, dünya siyasi arenasında dik duruşlu, Azərbaycanımızın uğurlarını həzm edə bilməyən siyasi qüvvələrə qarşı iti baxışlı Cənab İlham Əliyevin Prezidenti olduğu müasir Azərbaycanın bu gün dünyaya verdiyi sivil mücadilənin adı artıq bəllidir : Böyük Milliət, Yüksələn Bayraq, Bölünməz Vətən və Güclü Dövlət.

Bizim başqa ölkəmiz və başqa millətimiz yoxdur. Bizim bir vətənimiz olan azad Azərbaycanımız var. Onun üçün hər zaman Cənab Prezidentimizə dəstək olaraq, Prezidentimizlə bərabər Azərbaycanımıza sahib çıxacağıq.

Çünki Azərbaycanımızın müstəqilliyi Dönməzdir, Əbədidir və Sarsılmazdır.

Xəbərdən istifadə edərkən istinad etmək vacibdir.