Xəbər verdiyimiz kimi, 2021-ci il iyulun 1-dən etibarən bütün iş və xidmət sahələrində çalışanlara COVID-19 pasportu və ya COVID-19-a qarşı immunitet sertifikatı tələbi qoyulub.
Bəzi mütəxəssislər hesab edir ki, virusa yoluxub, qanında antitel olan insana yenidən əlavə COVID-19 peyvəndi vurmaq həmin insan üçün təhlükəlidir.
Bununla bağlı olaraq "Ölkə.az”a şikayət daxil olub. Belə ki, adının anoninm qalmasını istəyən vətəndaş qanında antitel olmasına baxmayaraq iş yerindən vaksinasiya olunması ilə bağlı ona tələb qoyulduğunu bildirib.
Bakı sakini saytımıza müraciətində bildirib ki, testin nəticəsində onda antitelin göstəricisinin 8.19 olduğu üzə çıxıb.
İcbari Tibbi Sığorta üzrə Dövlət Agentliyinin yaydığı məlumatda da qeyd olunur ki, "COVID-19 immunitet sertifikatı” son 6 ayda koronavirus analiz nəticəsi pozitiv olan vətəndaşlara verilir.
Amma vətəndaşın neçə ay əvvəl koronavirusa yoluxmasını antitel testi nəticəsində müəyyənləşdirmək mümkün olmayıb. Xəstəliyi gizli keçirən paytaxt sakini yoluxduğu vaxtı bilmədiyindən vaksinasiyadan keçmək istəmir.
Məsələ ilə əlaqədar Tibbi Ərazi Bölmələrini İdarəetmə Birliyindən "Ölkə.az”ın sorğusuna cavab olaraq bildirilib ki, qurum yalnız rayonlarda vaksinasiyaya nəzarət edir. Bakı şəhərindəki poliklinikalara isə Səhiyyə Nazirliyinin baxdığı qeyd olunub.
TƏBİB-dən həmçinin vurğulanıb ki, bu məsələlərlə əlaqədar yaranan suallara Nazirlər Kabineti yanında Operativ Qərargah aydınlıq gətirməlidir.
Səhiyyə Nazirliyinin mütəxəssisi Yavər Hacısoy Ölkə.az-a açıqlamasında bədəndə olan anticisimlərin varlığının peyvəndlənmə zamanı hər hansı bir problem yaradıb-yaratmaması ilə bağlı suallara aydınlıq gətirib. Mütəxəssis söyləyib ki, orqanizmdə olan IgG-nin (antitel - ölkə.az) vaksinasiya üçün əks göstəriş olduğuna dair heç bir mənbədə məlumat yoxdur:
"Yəni siz xəstələnib sağaldıqdan sonra bədəndə anticismlər az miqdarda qalması, vaksinasiyaya nə əks göstəriş deyil və hər hansı bir fəsad doğura bilməz. Xəstəliyi simptomsuz və ya yüngül keçirən insanların bəzilərində yaranan anticismlərin titri ya aşağı olur və ya ümumiyyətlə olmur. Bu səbəbdən seroloji müayinədə pozitiv nəticə olsa belə peyvənd orqanizmə daha güclü dəstək olacaq”, – Y.Hacısoy bildirib.
Nazirlər Kabinetindən isə müraciətlə əlaqədar hər hansı bir cavab verilməyib.
Xəbərdən istifadə edərkən istinad etmək vacibdir.
