L
İyunun 30-da Qarabağ döyüşlərində şəhid olan Cavadov Rauf Cavad oğlunun şəhadətə yüksəldiyi gündür.
Xeberle.com xəbər verir ki, Rauf Cavadov 1965-ci il oktyabrın 30 da Nefçala rayonu Qırmızıkənddə anadan olmuşdu. 8-ci sinfi bitirib, təhsilini Bakıdakı 5 saylı kimya biologiya təmayüllü internat məktəbində davam etdirib. 1983-cü ildə Dnepropetrovsk şəhərindəki metalrugiya instituna qəbul olunub. Eyni zamanda həmin institutda tank təmiri üzrə mütəxəssis kimi yetişib. 1988-ci ildə ali təhsilini bitirib, Sumqayıtdakı boru-prokat zavoduna kran təsərrüfatı üzrə elektrik dəzgahları ustası təyin olunub. 1993-cü ildə hərbi xidmətə çağırılıb. Bakıdakı Ali Zabitlər kursunu bitirib. Baş leytenant rütbəsi alıb. 1993-cü ilin iyulunda cəbhəyə yola düşüb. 2 ay Müdafiə Nazirliyinin Gəncədə yerləşən qərargahında işləyib. Oradan da Füzuliyə yola düşüblər.Silah üzrə rota komandirinin müavini idi. 1994-cü il iyun ayının 30-də qəhramancasına şəhid olub. İyul ayının 2-də doğulub boya başa çatdığı Qırmızıkənddə dəfn olunub. 2 övladı var. Qeyd edək ki, Rauf Cavadovun oğlu atası şəhid olduqdan bir neçə ay sonra dünyaya gəlib və atasının adını daşıyır.
Şəhdin həyat yoldaşı Təranə Cavadva həmin günü belə xatırlayır; ”İşdə idim, qızım Lamiyəni də özümlə aparmışdım. Qardaşım gəldi ki, qaynatan rəhmətə gedib, kəndə gedirik. Evə gəldik, hazırlaşıb yola çıxdıq. Rauf haqqında ürəyim heç nə gəlmirdi. Yolboyu ancaq onu dedim ki, gərək Raufa xəbər verəydilər, tez gələydi. Kəndə çatdıq, sən demə artıq, Raufu gətiriblər də, dəfn də ediblər. Bilmirəm kim idisə evdən çıxdı və dedi ki, Ay Təranə, artıq Rauf yoxdur.... Elə bildim həmin an göy parçalandı, hər şey başıma töküldü, torpaq ayağımın altından qaçdı. İlahi mən nə eşidirəm, axı onlar yolda başqa şeylər danışırdılar. ”
Məlumat üçün bildirək ki, atası birinci Qarabağ müharibəsində şəhid olan Rauf Cavadov da 44 günlük ikinci Qarabağ müharibəsi iştirakçısıdır.
Xədicə Səxavətqızı
Xəbərdən istifadə edərkən istinad etmək vacibdir.