MİQ-dən kənar işə qəbul olanlar da sertifikatlaşdırılmada iştirak edəcək.
Xeberle.com bildirir ki, bu sözləri müəllimlərin sertifikatlaşdırılması ilə bağlı Modern.az-a danışan təhsil eksperti Kamran Əsədov söyləyib.
Ekspert bildirib ki, müəllim daimi müqavilə ilə dövlət orta məktəbində çalışırsa, o heç bir məhdudiyyət olmadan sertifikatlaşdırılmada iştirak edə biləcək:
"İkili ixtisası olan və iki fəndən dərs deyən müəllim hansı fəndən istəsə, ondan da sertifikatasiyadan keçəcək. İstəsə ikisində də iştirak edəcək. 2017-ci ilin 14 iyununa qədər işə qəbul olunmuş ibtidai sinif müəllimləri avqustda sertifikatlaşdırılmaya cəlb olunacaq. 2017-ci ilin 14 iyunundan sonra işə qəbul olunanlar növbəti ildə - yəni əmrin 5 ili tamam olanlar prosesə cəlb olunur. İbtidai sinf müəllimlərinin sertifikatlaşdırılması başa çatandan sonra digər fənlər üzrə sertifikatlaşdırılmanın keçirilməsi elan olunacaq. Yaşı 65 olanlar istəsələr, sertifikatlaşdırılmada iştirak edə bilərlər. Bu, onların müqavilələrinin uzaldılmasına imkan verən hal hesab oluna bilər”.
K.Əsədov qeyd edib ki, fənlər üzrə çərçivə sənədi təqdim olunub, amma konkret həm ixtisas, həm də təhsil strategiyası, standartları ilə bağlı ədəbiyyat siyahısı təqdim olunacaq:
"Sertifikatlaşdırılma 2 mərhələdən ibarətdir. Birinci mərhələdə maksimum bal 60 baldır, 30 bal toplayan ikinci mərhələyə buraxılır. Burada maksimum bal 40 baldır, 20 bal toplayan sertifikatlaşdırılmadan keçmiş hesab edilir. Əgər bu iki mərhələdən birindən keçid balı toplanılmasa, ona dərs saatına, maaşına, iş yerinə toxunmadan bir il vaxt verilir ki, get hazırlaş gəl. Əgər 2-ci dəfə, 1 il sonra da müvafiq bal toplamasa, o müəllim ilə bağlanmış müqaviləyə xitam verilir, yəni işdən azad edilir. Bundan sonra o adi qaydada müsabiqədə iştirak edərək müəllim ola bilər”.
Ekspertin sözlərinə görə, hər kəs dərs dediyi ixtisasdan, keçdiyi kitabdan tərtib olunmuş suallara cavab verəcək:
"Təhsil Nazirliyində yaşı 30-35 olan uşaqlar 40 ilin müəllimini imtahan edə bilər? Bu gənclər müəllimlərimizin yetirməsidir. Onlar müəllimlərini imtahan etmir. Sadəcə olaraq, bir insan 5 ildən çox bir fənni tədris edirsə, ən azı ildə 1 dəfə kitabı oxuyur, şagird danışır eşidir, KSQ, BSQ sualı yazır. Deməli, fənnini bilir. Bu cavan oğlanlar müəllimlərini uzunluğa tullanma, ağırlıq qaldırma, 100 metrə 9 saniyə qaçmağı yoxlamır. Müəllimlər keçdiyi kitabdan tərtib olunmuş suallara cavab verəcək. Mən tarix müəllimiyəm. Dərs dediyim və tədris olunan kitablardan nə qədər istəsəniz imtahan edin. Mən niyə narahat olmalıyam? 40 ilin müəllimi 40 ildir ki, bu kitablarla işləyir, deməli, bizdən dəfələrlə yaxşı bilir. Müəllimin öz ixtisasından, illərdir dərs dediyi fəndən müəllim yanına getməsi ayıbdır”.
K.Əsədov deyib ki, məqsəd, təhsilin inkişafı, keyfiyyətin yüksəldilməsi və təhsilverənlərin peşəkarlıq səviyyələrinin artırılmasıdır:
"Təhsil Nazirliyində çalışanların özlərini imtahan etmək lazımdır? Təhsil Nazirliyi dövlət orqanıdır və burada işə qəbul dövlət qulluğuna qəbul imtahanı ilə olur. Hələ bu imtahan isə, heç kimin ixtisasından olmur. 16 fərqli qanunvericilik aktlarından ibarət olan test imtahanı, ardınca ondan da çətin müsahibə mərhələsi olur. Ondan sonra 1 il sınaq, 6 ay staj müddətində işə qəbul olunurlar. Yəni onlar zatən imtahan olunub. Amma onlar nə qədər vəzifə öhdəliklərini yerinə yetirir, bu ayrı məsələ. Ölkənin orta məktəblərində 150 min müəllim var. Lap bunlar hamısını işdən azad etdilər. 150 min yeni adamı hardan tapacaqlar? Onların müəllimlərin yerində gözü yoxdur. Onlar zatən lazım olan yerlərə etibar etdiklərini qoyublar”.
Xəbərdən istifadə edərkən istinad etmək vacibdir.