Sumqayıt Regional Mədəniyyət İdarəsinə tabe olan Nəriman Nərimanov adına Mədəniyyət Mərkəzində 26 iyun Silahlı Qüvvələr Gününə həsr olunan "Ordum varsa, yurdum var!” adlı musiqili gecə keçirilib. Tədbirdə rəsm kursu üzvlərinin mövzu ilə bağlı rəsm işləri sərgilənib. Gecədə Qələbəmizi bizə yaşadan hərbiçilərimiz, şəhidlərimizin ailə üzvləri, qazilərimiz, yaralılarımızın həyatlarını canları bahasına xilas edən həkimlərimiz iştirak ediblər. Azərbaycan Respublikasının Dövlət Himni ilə açıq elan edilən tədbir Ali Baş Komandanımız İlham Əliyevin möhtəşəm Zəfər müjdələrini tərənnüm edən videoçarxla davam etdirilib. Tədbirdə Sumqayıt şəhər İcra Hakimiyyəti Vətən Müharibəsi İştirakçiları və Şəhid Ailələri İşinin Təşkili şöbəsinin müdiri Tərlan Hacızadə I və II Qarabağ savaşı zamanı Silahlı Qüvvələrimizin rolundan, şəhidlərimizin qəhrəmanlığından və qazilərimizin şücaətindən ətraflı söhbət açıb.
Əməkdar artistlər: Cəlal Məmmədovun, Rauf Ağakişiyevin ifalarında şair İbrahim İlyaslının "Qarşınızda bir ömür sayğı duruşundayız”, Əyyub Qiyasın "Qarabağ qaziləri”, Əşrəf Veysəllinin "Sən, qalib gələcəksən!” şeirləri səslənib. Qiraətçi Əliağa Tapdıqlı "Əsgər məktubu” mənzum şeirini, xanəndə Məlahət Hacıyeva, müğənnilər- Təranə Nurlu, Əli Əzizoğlu vətənpərvər ruhlu mahnılar ifa ediblər.
Tədbirin sonunda Namiq Abasovun rəhbərlik etdiyi "Dərviş” qrupunun üzvləri: rejissor Ümid Abasın ifasında Əliağa Vahidin şeirilə xanəndə Zeynal Əhmədovun həmahəng ifası hər kəs tərəfindən hərarətlə qarşılanıb.
Xəbərdən istifadə edərkən istinad etmək vacibdir.
