Xəbər verdiyimiz kimi, İsrailin Baş naziri Benyamin Netanyahu mayın 7-də Azərbaycana gələcək. Netanyahu Azərbaycanın rəsmi şəxsləri, həmçinin ölkənin yəhudi icmasının nümayəndələri ilə görüşlər keçirəcək. Baş nazirin mayın 11-də İsrailə qayıdacağı qeyd edilir.
Bu görüşlər zamanı hansı məsələlər müzakirə oluna bilər?
Milli Məclisin deputatı Aydın Mirzəzadə "Unikal"a açıqlamasında bildirib ki, Azərbaycan-İsrail münasibətləri çox yüksək səviyyədədir. Onun sözlərinə görə, tərəfdaşlıq və əməkdaşlığımızın nümunələri çoxdur:
"İsrail Azərbaycanın ərazi bütövlüyünə çox böyük hörmətlə yanaşıb. Azərbaycanın yeni texnologiyalara yiyələnməsi istiqamətində öz dəstəyini verib. Bu baxımdan İsrail hökumət başçısının Azərbaycana səfəri əməkdaşlığı daha da gücləndirə və əməkdaşlıq sahələrimizi genişləndirə bilər. Şübhəsiz ki, təhlükəsizlik məsələlərinə dair çox ciddi fikir mübadiləsi keçiriləcək. Ən əsası isə Azərbaycanın həm İsrail, həm də İranla yaxşı münasibətləri olduğunu əsas götürərək Azərbaycan bu iki dost olduğu ölkələr arasında münasibətlərin bərpası işində böyük rol oynaya bilər. Hər halda İsrail Baş nazirinin Azərbaycana səfərinin tək regionun deyil, dünyanın da ən ciddi maraq doğuran siyasi hadisələrindən bir olması gözləniləndir".

Xəbərdən istifadə edərkən istinad etmək vacibdir.