Suriyada “Bəəs” rejiminin həbsdə olan müxalifətçilərə sistemli şəkildə tətbiq etdiyi işgəncənin foto şəkilləri yayılıb. ANS PRESS-in məlumatına görə, yeni aşkarlanan 8 şəkildə müxaliflərin əsasən ac saxlanılaraq, kəsici və deşici alətlərlə öldürüldüklərini görmək mümkündür. 

Ötən həftə başda İsveçrə olmaqla 58 ölkə BMT Təhlükəsizlik Şurasına məktub yazaraq Suriyadakı vəziyyətin Beynəlxalq Cinayət Məhkəməsi (BCM) tərəfindən araşdırılmasını dəstəklədiklərini bildirmişdilər. 

BMT baş katibi Pan Ki Mun və BMT İnsan Hüquqqları üzrə Ali Komissarı Navi Pillay da bu barədə açıqlama verərək Suriyada insan hüquqlarının pozulduğuna dair güclü sübutları olduğunu deyərək bu işdən məsul olanların mühakimə olunması üçün BMT Təhlükəsizlik Şurasına müraciət edib. 

Daha əvvəl Rusiya və Çin Suriyada işlənən müharibə cinayətlərinin BCM-yə göndərilməsi üçün Fransa tərəfindən hazırlanan və ötən gün BMT TŞ-də səsverməyə çıxarılan qanun layihəsinin Suriyada problemin həlli cəhdlərinə xeyri olmayacağını deyərək bu layihəni veto edib.