![](/uploads/posts/2024-07/1721989148_esas.jpg)
Azərbaycanda bu gün psixoloq müayinəsi və yardımına az qala bütün ölkə əhalisi ehtiyac duyur.
Xüsusən gənclər, yeniyetmələr, ailə həyatı uğurlu olmayan qadınlar uzun müddət depressiyada olan şəxslər dərman müalicəsi ilə yanaşı psixotertapiyadan da keçməlidirlər.
Sosial şəbəkə, efirlərə mütəxəssis kimi cəlb olunan populyar psixoloqların qəbulu isə az qala "professor qiyməti”nə qalxıb. Bəzən qazanc xətrinə qeyri-peşəkarlar da bu sahəyə üz tuturlar. Qiymətlər isə əl yandırır. Müxtəlif problemlərlə bağlı psixoloqlara üz tutanlar qiymətlərin büdcələrinə uyğun olmadığından şikayətlənirlər.
Məsələ ilə bağlı araşdırma etdik. Məlum oldu ki, Bakıda psixoloq qəbulunun bir seansı orta hesabla 30-50 manatdan başlayır. Elə psixoloji yardım mərkəzi var ki, bir seansının qiyməti 90 manatdır. Uşaqlar üçün isə qiymətlər qismən fərqlidir. Həftədə 1 dəfə, 45 dəqiqəlik seansın qiyməti 90 manat, həftədə 3 dəfə olan seansın qiyməti 250 manatdır. Uşaqlar üçün həftədə 1 dəfə keçirilən qrup terapiyasının qiyməti 50 manatdır. Sözsüz ki, daha məşhur psixoloqlar konsultasiya üçün 80-100 manat alır, hətta bir seansa 400 manat alan psixoloqlar da var.
Bəs görəsən, Sumqayıt şəhərində psixoloqların qəbulu hansı qiymət aralığındadır?
Xeberle.com məsələnin kommersiya tərəfini araşdırıb. Psixoloq Dürdanə Məmmədovada qəbul qiymətləri 15-30 AZN arasıdır - uşaqlar üçün 45 dəqiqəlik seanslar 15 AZN, böyüklər üçün isə 30 AZN-dir.
Psixoloq Rima Əyyubovada qiymətlər isə 20- 30 AZN aralığındadır. 18 yaşa kimi şəxslərin seansı 20 AZN, 18 yaşdan yuxarı şəxslər üçün isə 30 AZN-dir.
Sonda belə qənaətə gələ bilərik ki, Bakı ilə müqayisədə Sumqayıtda qiymətlər ürəkaçandır. Ümid edirik ki, paytaxt Bakıda da psixoloqların qəbul qiymətləri insanların büdcəsinə uyğun tənzimlənəcək.
Elşən Yəhyayev
Xəbərdən istifadə edərkən istinad etmək vacibdir.