Bu il ali məktəblərə qəbul imtahanlarında yüksək nəticə göstərən şagirdlərdən biri də Sumqayıt şəhəri 25 nömrəli tam orta məktəbin məzunu Əzimli Mətləb Famil oğludur. 11 illik məktəb həyatını qırmızı attestatla tamamlayan Mətləb buraxılış imtahanından 295 bal, blok imtahanından isə 377.4 bal toplayaraq ümumilikdə 672 bal nəticə göstərib.
Riyaziyyata və dəqiq elmlərə xüsusi marağı olan gənc abituriyent, təhsil uğurlarını həm ailəsinin, həm də müəllimlərinin dəstəyinə borclu olduğunu deyir. Hazırda onun əsas hədəfi – Bakı Ali Neft Məktəbində ingiliscə tədris olunan neft-qaz mühəndisliyi ixtisasında təhsil almaqdır.
Xeberle.com-un əməkdaşı Mətləb Əizmli ilə yüksək nəticə əldə etməyin yolları, motivasiya mənbələri və gələcək planları barədə həmsöhbət olub:
– Bu qədər yüksək nəticə əldə etmək üçün hansı fənlərə daha çox diqqət yetirirdin?
Hər zaman riyaziyyata xüsusi marağım olub. Bunun təsiri ilə fizika və kimya fənlərini də sevə-sevə oxuyurdum. Bu maraq bəlkə də mənə irsi ötürülüb, çünki babam Əzimov Mətləb 50 illik riyaziyyat müəllimidir. Atam və bibimlər də bu sahədə biliklidirlər, atam hazırda mühasib işləyir. Anam isə ibtidai sinif müəlliməsidir. Ailəm və müəllimlərim mənə hər zaman dəstək olublar.
– Bu yolda sənə kimlər motivasiya edirdi?
Düzünü desəm, oxumağa marağım hələ uşaq yaşlarımdan formalaşıb. Uğurlarımda ilk müəllimələrimin – bağçada Gülbəniz müəllimənin, ibtidai sinifdə Şamama müəllimənin və daha sonra məktəb və repetitor müəllimlərimin böyük rolu olub. Onlara təşəkkür edirəm. Ən böyük motivasiyanı isə ailəmdən almışam.
– Ən yüksək nəticə əldə etdiyin fənn hansıdır və niyə?
Buraxılış imtahanında riyaziyyat və ingilis dilindən maksimum – 100 bal toplamışam. Azərbaycan dilindən isə 95 bal almışam. Ən yüksək nəticəni göstərdiyim fənn riyaziyyatdır, çünki bu fənnə uşaqlıqdan həvəsim olub və daim üzərində çalışmışam.
– Gələcəkdə özünü hansı sahədə görürsən?
Hədəfim – Bakı Ali Neft Məktəbində (BANM) ingiliscə tədris olunan neft-qaz mühəndisliyi ixtisası üzrə bakalavr təhsili almaqdır. Magistraturanı isə xaricdə davam etdirməyi planlaşdırıram.
– Təhsilini ölkə daxilində, yoxsa xaricdə davam etdirmək istəyirsən?
Hazırda BANM-də təhsil almaq istəsəm də, gələcəkdə magistr pilləsini xarici ölkələrdə oxumaq planım var.
– Sumqayıtlı bir şagird kimi şəhərdəki təhsil imkanlarını necə qiymətləndirirsən?
Sumqayıtda, hətta sıravi məktəblərdə belə keyfiyyətli təhsil almaq mümkündür. Məncə, oxumaq istəyən şagird üçün yer və şərait əsas deyil – əsas olan məqsəd, istək və əzmli olmaqdır.
– Gələcək abituriyentlərə və məktəbli dostlarına nə tövsiyə edərdin?
Gələcək abituriyentlərə və məktəblilərə tövsiyəm odur ki, özlərinə hədəf müəyyənləşdirsinlər və bu yolda əzmlə çalışsınlar. Əmin olun ki, heç bir zəhmət boşa getmir. Nəticələr gec-tez öz bəhrəsini verir.
-Bizə vaxt ayırdığın üçün təşəkkür edirəm.
Sağ olun.
Söhbətləşdi: Elşən YƏHYAYEV
Xəbərdən istifadə edərkən istinad etmək vacibdir.
