Norveçin Stavanger şəhərində fəaliyyət göstərən Norveç-Azərbaycan Cəmiyyəti növbəti dəfə böyük ailə kimi birləşərək Dünya Azərbaycanlılarının Həmrəyliyi Gününü və Yeni ili qeyd ediblər. Tədbir çox şən, səmimi, isti və ailəvi ab-havada keçib. Bayram şənliyində təxminən 130 nəfər iştirak edib.
Bayram gecəsi çərçivəsində uşaqlar üçün zəngin əyləncə proqramı hazırlanıb. Animatorlar, köpük şousu, eləcə də Şaxta Baba və onun köməkçiləri balacalara hədiyyələr paylayıblar. Böyüklər üçün viktorina təşkil olunub və qaliblər mükafatlarla təltif edilib.
Bayram süfrəsinin xüsusi bəzəyi isə cəmiyyətin xanımları tərəfindən hazırlanmış milli şirniyyatlar və müxtəlif təamlar olub. Bu nemətlər tədbirə ev istiliyi və milli ruh qatıb.
Çay süfrəsindən və Şaxta Babanın yola salınmasından sonra tədbir daha da rəngarəng davam edib. İştirakçılar birlikdə rəqs edib, şən musiqi sədaları altında bayram əhval-ruhiyyəsi daha da yüksəlib.
Əlbəttə ki, bu gözəl axşam milli rəqsimiz Yallısız keçməyib. Yallı rəqsi tədbirin ən yaddaqalan anlarından birinə çevrilib və milli birliyimizi, həmrəyliyimizi bir daha nümayiş etdirib.
Cəmiyyətin sədri İradə İsmaili bildirib: "Vətəndən uzaqda yaşamağımıza baxmayaraq, birliyimizi qoruyub saxlamağımız sevinc içində bir-birimizə müsbət enerji bəxş etməyimiz böyük qürur mənbəyimizdir. Fürsətdən istifadə edərək bütün dünya azərbaycanlılarına sülh, rifah, sağlamlıq və firavanlıq arzulayıram.
Xatırladaq ki, Norveçin Stavanger şəhərində yaşayan azərbaycanlıların qoşulduğu bu cəmiyyət - Aserbajdsjansk-Norsk Kulturforeinin uzun illərdir ki, fəaliyyət göstərir və birliyin əsas məqsədi azərbaycanlıları bir araya toplamaq, milli mədəniyyətimizi, adət-ənənələrimizi və dilimizi qoruyub saxlamaq, eləcə də Vətəndən uzaqda böyüyən uşaqlara bu dəyərləri aşılamaqdır.
Cəmiyyət üzvləri üçün bir-birinə dəstək olmaq, tək olmadıqlarını hiss etmək, ortaq mədəniyyətə və gələcəyə sahib olduqlarını bilmək olduqca önəmlidir.
Xəbərdən istifadə edərkən istinad etmək vacibdir.
