Tanınmış psixoloq Nizami Orucov Sumqayıt şəhəri ilə bağlı maraqlı və gülməli xatirəsini ictimaiyyətlə paylaşıb.
Onun sözlərinə görə, 2015-ci ildə Rusiyadan Azərbaycana yeni qayıtdığı dövrdə Sumqayıtda heç vaxt olmayıb. Həmin vaxt evlənəcəyi xanımla ilk görüşlərindən birini məhz bu şəhərdə planlayıblar. Görüş zamanı xanım ona "Göyərçinin yanında gözlə” deyib.
Psixoloq əvvəlcə bunu zarafat kimi qəbul etdiyini bildirib:
"Düşündüm ki, mənimlə zarafat edir. Dedim ki, axı göyərçin bir yerdə durmur, onun arxasınca necə çatım?” – deyə Orucov xatırlayıb.
Sonradan məlum olub ki, söhbət Sumqayıtdakı məşhur "Göyərçin” abidəsindən gedirmiş. Nizami Orucov qeyd edib ki, həmin hadisədən sonra Sumqayıt onun yaddaşında həmişə bu xoş zarafatla qalıb.
Psixoloq şəhər haqqında təəssüratlarını da bölüşərək Sumqayıtı çox bəyəndiyini vurğulayıb:
"Sumqayıt çox möhtəşəm şəhərdir – yaşıl, geniş və rahat. Bakıya bağlılığım olmasaydı, köçmək istədiyim şəhərlərdən biri mütləq Sumqayıt olardı”.
Qeyd edək ki, Sumqayıt həmişə infrastrukturu, həmçinin geniş yol, park və xiyabanları ilə sakinlərin və qonaqların rəğbətini qazanan şəhərlərimizdən biri olub. Lakin son vaxtlar bəzi plansız tikintilər və miqrasiya nəticəsində şəhərdə sıxlıq müşahidə olunur.
Elşən Yəhyayev
Xeberle.com
Xəbərdən istifadə edərkən istinad etmək vacibdir.
