Azərbaycanlı məmurlarda qəribə bir xasiyyət yaranıb. Mütləq dövlət başçısının müşavirəsi olmalı və onlar tənqid və tənbeh olunmalıdır ki, işlərindəki nöqsanlara fikir versinlər. Hələ aradan qaldırmaqları bir yana. Birinci yarımilin yekunlarına həsr olunmuş müşavirədə prezdent İlham Əliyev əhalinin su ilə təminatı məsələsinə də xüsusilə toxundu. Və bildirdi ki, ictimaiyyət bütün çatışmazlıqlar barədə ona mesajlar versin. Bir vətəndaş kimi mən də dövlət başçısına kiçicik bir ismarıc göndərmək istəyirəm.

Sumqayıtın respublikamızın bütün sahələrində tutduğu mövqe və oynadığı rol barədə danışmaq yersizdir, daha doğrusu, danışsaq da, qurtarmaz. Elə Sumqayıtın kommunal problemləri kimi. Bəli, məhz kommunal problemləri, xüsusilə də su təchizatında. Nə qədər qəribə olsa da, Sumqayıt əhalisinin su təchizatı hələ tam həll olunmayıb. Uzağa getməyək. Bu isti yay günlərində şəhərin bir çox mikrorayon və məhəllələrinə su hələ də qrafiklə verilir. Misal da çəkə bilərəm. Sumqayıtın ən böyük mikrorayonlarından biri olan 9-cu mikrorayonda yuxarı mərtəbələrə su vaxtla – qrafiklə verilir. Səhər saat 6-dan 9-a kimi və axşam da 6-dan 9-a kimi. 6 və 9 rəqəmləri bu mikrorayonun sakinləri üçün artıq müqəddəs hesab edilir. Və sutkanın iki vaxtında – saat 6-dan 9-a kimi sakinlərin çox sevdikləri bir zamandır. Yuyunurlar, paklanırlar, çay içirlər, yemək bişirirlər.

Gündə iki dəfə xoşbəxt olmaq və sutka ərzində həmin zamanı gözləmək bilirsinizmi necə gözəl hisslərdir. Aşağı mərtəbələrdə yaşayan və daimi suyu gələn sakinlər bunun ləzzətini hiss edə bilməzlər. Hətta paytaxta işləməyə, oxumağa gedən 9-cu mikrorayon sakinlərinin 20 yanvar dairəsində marşurutlara minmək uğrunda mübarizəsi də bu müqəddəs vaxta yetişmək üçündür. Gülməli gəlir elə deyilmi? Onda başıma gələn daha bir gülməli bir əhvalat danışım sizə. Axşam saat 11-də qapı döyüldü. Qapını açanda gördüm ki, cavan oğlan və xanımdır. Məni görən kimi xanım heç içəri dəvəti belə gözləməyib başladı ki, bəs filan sutəmizləmə aparatları istehsal edən şirkətin nümayəndələridir və pulsuz olaraq evimizdə krantdan gələn suyun keyfiyyətini yoxlayacaqlar və sair və ilaxır. Səbirlə dinləyərək dedim ki, xanım artıq saat 12-ə 5 dəqiqə işləyib və bu vaxtda bizim krantdan bulanıq su belə gələrsə, onu möcüzə deyib başıma çəkərəm. Rəhmətliyin qızı, biz günün gündüz vaxtı saat 11-də suya həsrətik, o ki qaldı bu vaxt ola. Yazıqlar pərt və suyu süzülə-süzülə sağollaşıb getdilər.

Bu arada "Azərsu” ASC özünə yeni, 20 mərətbəli inzibati bina tikdirir. Məni bir sual maraqlandırır. Görəsən həmin binanın yuxarı mərtəbələrinə su veriləcək? Əlbəttə veriləcək. Ola bilərmi ki, 900 nəfər üçün nəzərdə tutulan bina susuz qalsın?! Sağ olsun su nasosları. Stop! Demək "Azərsu”nun təəssübkeşlərinin "Nasos çatmır, ya da yuxarı mərtəblərə sus vermək üçün güclü nasoslar lazımdır” kimi bəhanələri sabun köpüyü kimi boş çıxır. 900 nəfər üçün nasos quraşdıran "Azərsu” sakinlərinin bəlkə də sayı 9 minə çatan 9-cu mikrorayon üçün niyə həmin nasoslardan qoymur? Pulu yoxdur? Pulu yoxdursa, o boyda zırıltı binanını necə tikdirir? Gül kimi binası var da 20 yanvar dairəsində. Yeni binaya xərclənən pula gör nə qədər nasos almaq olar? Axı sakinlər vanna, vedrə, butulka ilə niyə su tədarükü görməlidir? Yəni bu sakinlərin günün istənilən vaxtında sulanan ağac, kol və qazonlar qədər də dəyəri yoxdurmu? Müğənni cibindən xərc çəkib kəndinə su çəkdirir ki, camaat aydınlığa çıxsın, paklansın. Hər dəfə H.Z.Tağıyev qəsəbəsinin girişində "Ehsanın su olsun, Hacı” lövhəsini görəndə rəhmət oxuyuram. Hələ mən bir yana onun çəkdirdiyi Şollar suyundan içən hər şəxs hər dəfə rəhmət oxuyur. Suyu qrafiklə alan sakinlər də rəhmət oxuyur, amma gündə iki dəfə – saat 6-dan 9-a kimi.

Elvin BABAYEV (reader.az)

P.S. Bu arada yazıda ancaq 9-cu mikrorayonun adının hallandırılması bir növ məsəl üçün idi. Haqqında bəhs etdiyim problem Sumqayıtın bir çox mikrorayon və məhəllərində mövcuddur. Yazsam roman olur…