Xəbər vermişdik ki, Sumqayıt şəhər 1 saylı Təcili Tibbi Yardım Xəstəxanasında müalicə alan sənət adamı pulsuzluq üzündən baxımsız qalıb. Sintezator ifaçısı Seymur Həsənov ayağına mil qoyulma əməliyyatı üçün dövlət xəstəxanasında 2000-2500 manat pul istənildiyini idda etmişdi. Sumqayıt teatrının aktyoru, əməkdar artist Rauf Ağakişiyevin facebook profilində bu barədə fikir bildirilmişdi.
Məsələ ilə bağlı Sumqayıt şəhər Təcili Tibbi Yardım Xəstəxanasına yollandıq. Xəstəxananın baş həkimi Rauf Sadıqov Xeberle.com-a açıqlamasında bildirdi ki, rəhbərlik etdiyi xəstəxanada müalicə alan xəstədən pul istənilməsi ilə bağlı söylənilənlər həqiqəti əks etdirmir: "Bu deyilənlər həqiqəti əks etdirmir. Dövlət tərəfindən xəstəxanamızada hər cür şərait yaradılıb. Xəstə Seymur Həsənovdan pul istənilməsinə gəlincə isə bu haqda söhbət gedə bilməz. Bildiyiniz ki, Sumqayıt səhiyyəsində köklü islahatlar aparılır. Zakir Fərəcov Sumqayıt şəhərinə icra başçısı təyin olunduğu gündən bu sahəyə xüsusi diqqət yetirir. Belə hallar tamamilə yığışdırılıb. Xəstələrə yüksək səviyyədə xidmət göstərilir. Heç bir həkim xəstədən pul tələb edə bilməz. Xəstəxanamıza Səhiyyə Nazirliyindən dərman ləvazimatları verilir və bu vasitələr də xəstələrin müalicəsində istifadə olunur. Xəstəxanamızda dövlətin dəstəyi sayəsində xəstələr yeməklə də təmin olunur”.
Baş həkimin yanından çıxıb həmin xəstəxananın Travmatologiya şöbəsinin III korpusunda 8-ci palatada müalicə alan Seymur Həsənovun yanına üz tutduq. Travmatologiya şöbəsinin həkimi, xəstənin həkim-travmatoloqu Bəhram Ramazanov Xeberle.com-a açıqlamasında söylədi ki, xəstədən heç bir ödəniş tələb olunmayıb və hazırda xəstə müalicəsini davam etdirir: "Xəstə dekabrın 1-də qəbul edilib. Personalımızdan heç kim ondan pul tələb etməyib və belə bir məlumatın da heç bir əsası yoxdur. Bütün lazımi tədbirlər həyata keçirilib. Ayağında sınıq var və sabah xəstə təmənnasız əməliyyat olunacaq."
S.Həsənov və onun atası Eynulla Həsənov palatada onalara yüksək səviyyədə xidmət göstərildiyini dedilər və onun adından yayılan məlumatları əsassız saydılar. Xəstə və onun atası Xeberle.com-a bildirdi ki, müalicə aldığı müddətdə ondan müalicə üçün haqq alınmayıb və belə bir tələb də olmayıb. Xəstənin valideyni portalımıza onu da dedi ki, oğlunun müalicəsi hazırda davam edir, müalicə həkimindən və tibb işçilərindən heç bir şikayəti yoxdur”.

Ramil Zeynallı
Xeberle.com