Xeberle.com mövzuya marağı və aktuallığı nəzərə alaraq, Naftalan Otel Qaşaltı-nın baş həkimi olan Şahin Babayev ilə müsahibəni təqdim edir.

- Sanatoriyada xəstəliklərin müalicəsi hansı yollarla aparılır?

- Təbii müalicəvi Naftalan nefti ilə 70-dən artıq xəstəlik müalicə olunur. Müraciət edən xəstələr birinci növbədə tam – çekap müayinədən keçir. Çekap müayinəsinə labarator analizlər, USM müayinəsi, EKQ və bütün ixtisas həkimlərinin müayinəsi daxildir. Müalicə həkimləri müayinənin nəticələrindən asılı olaraq pasiyentlərin xəstəliyinə uyğun olaraq müalicə proqramı təyin edir. Müalicə paketinə Naftalan və yod brom vannaları, müxtəlif fizioterapiya proseduraları, müalicə bədən tərbiyəsi, massaj, parafin daxil edilir. Klinikamızda çekapa daxil olan müalicələrdən əlavə Pnevmapunktura, Zərbə dalğası, UFB, sualtı dartqı, 4-kameralı və karbon vannası kimi müalicələr də mövcuddur ki, xəstələrin müalicəsində çox böyük rol oynayır.

- Naftalan neftinin hansı faydaları var?

- Təbii Naftalan neftinin tərkibi çox zəngindir. Belə ki, bu neftin tərkibində Naften turşusu, azot birləşmələri, mikro, makro elementlər, yod, brom və s. var. Ancaq Naftalanın tərkibinin 50-55%-ni naften karbohidrogeni təşkil edir. Naften yağı unikal maddə olub, insan orqanizmində olan steroid qrupuna daxil olan hormonlara çox yaxın maddədir. O cümlədən esterogen, proqesteron, testesteron, vitamin –D Serotonin, ürək qlikozidləri, od turşuları kimyəvi quruluşca naften yağına çox yaxındır. Ona görə də həmin ferment və hormonların çatışmaması nəticəsində yaranan xəstəliklərin müalicəsində çox böyük faydası var. Naften yağının təsiri ilə iltihabi proses və spazm aradan qalxır, ağrı azalır, aktivlik artır, maddələr mübadiləsi sürətlənir, immun sistemi gücləndirilir, xanımlarda ovogenez və ovulyasiya, kişilərdə spermotogenezə müsbət təsir göstərir. Müalicə olunan xəstələrdə uzunmüddətli remissiya alınır, hansı ki, dərman müalicəsi ilə o effekti almaq mümkün deyil.

- Baş həkim kimi sanatoriyada iş prosesini necə təşkil edirsiniz?

- İş prosesi birinci növbədə ciddi nizam-intizamdan başlayır. Başda özüm olmaqla o intizamı yaratmışıq. İkincisi, sanatoriyamızda savadlı, təcrübəli həkim və tibb bacılardan ibarət işçi heyətimiz var. Qonaqların sağlamlığı və məmnuniyyətini qazanmaq üçün var güclərini sərf edirlər. Randevu proqramı üzrə qonaqların vaxtlı vaxtında müalicəsini verirlər.

- Daha çox sanatoriyaya hansı xəstəliklərlə bağlı müraciət edirlər?

- Sanatoriyamıza əsasən oynaq, damar, sinir sistemi, dəri və sonsuzluq problemi ilə bağlı müraciət edirlər.

- Müraciət edənlərin məmnuniyyətini qazanmaq üçün sanatoriyada hansı işlər aparılır?

- Qonaqların keyfiyyətli müalicəsi ilə yanaşı, asudə vaxtlarında istirahət etmələri hər zaman diqqətimizdədir. Sanatoriyamızın əyləncə mərkəzində müxtəlif əyləncəli proqramlar təskil olunur. Canlı konsert proqramları, stolüstü oyunlar və master-klass yarışları, film nümayişi, futbol və voleybol yarışları, istirahət günləri görməli məkanlara ekskursiyalar və s. təşkil olunur.

- Sanatoriyaya müraciət edənlərin arasında başqa ölkələrin nümayəndələri varmı?

Bəli. Sanatoriyamıza ölkəmizin müxtəlif bölgələrindən və qonşu ölkələrdən çox sayda qonaq baş çəkir. O cümlədən Rusiyadan, Qazaxıstandan, Özbəkistandan, Ukraynadan, ərəb ölkələrindən. Son vaxtlar isə Avropa ölkələrindən də çox sayda qonaq gəlir.