Bayram ərəfələrində və xüsusi günlərdə Sumqayıt şəhərinin
küçə və prospektlərində, səkilərdə, böyük marketlərin qarşısında qanunsuz küçə
ticarətinin aktivliyi müşahidə olunur.
Belə hallara şəhərin 20 Yanvar, Nizami meydanı və Nəriman Nərimanov küçəsində daha çox rast gəlinir.
Məsələ ilə bağlı Qida Təhlükəsizliyi Agentliyi ilə əlaqə
saxladıq. Agentlikdən Xeberle.com-a bildirildi ki, "Qida Təhlükəsizliyi Agentliyi küçə ticarəti aparılan ərazilərdə yaranmış antisanitar vəziyyətlərə
cavabdehdir və belə bir hallarla rastlaşmısınızsa dəqiq ünvan bildirin,
qeydiyyata götürüləcək və araşdırılma aparılacaq. Digər hallar da isə küçə
ticarətinə nəzarəti şəhər İcra Hakimiyyəti həyata keçirir.”
Sumqayıt Şəhər İcra Hakimiyyətindən isə Xeberle.com-a verilən
açıqlamada bildirilir ki, ölkəmizin hər yerində olduğu kimi Sumqayıt şəhərində
də koronavirusa qarşı aparılan tədbirlər davam edir, sanitar epidemioloji vəziyyət
ciddi nəzarət altında saxlanır, qabaqlayıcı tədbirlər həyata keçirilir:
"Sumqayıt şəhərində yalnız bu ərəfədə deyil, mütəmadi olaraq müəyyən olunmamış
yerlərdə aparılan küçə ticarətinin qarşısının alınması məqsədilə aidiyatı
qurumlar tərəfindən monitorinq keçirilir, mövcud obyektlərin sahiblərinə küçələrə
ərzaq və qeyri-ərzaq məhsullarının yığılmaması və obyektlərin ətrafının təmiz
saxlanması ilə bağlı xəbərdarlıq olunur.
Qurumun açıqlamasında o da qeyd edilir ki, Sumqayıt şəhər
İcra Hakimiyyəti başçısının sərəncamı ilə koronavirus epidemiyasına qarşı
qabaqlayıcı tədbirlərin görülməsi ilə bağlı komissiya yaradılıb. Komissiya tərəfindən
şəhər sakinləri arasında maarifləndirici tədbirlər həyata keçirilir, Nazirlər
Kabineti yanında Operativ Qərargahın qəbul etdiyi qərarlara və müəyyənləşdirdiyi
qaydalara əməl olunmasına ciddi şəkildə nəzarət həyata keçirilir. Koronavirus təhlükəsi
ilə əlaqədar şəhərin bütün təhsil və səhiyyə binaları, idarə və müəssisələr, məscidlər,
binaların blokları, ictimai nəqliyyat vasitələri, əhalinin daha çox olduğu məkanlar,
eləcə də ticarət obyektləri davamlı şəkildə dezinfeksiya olunur: "Qeyd
etdiyiniz məsələ ilə bağlı şəhər sakinlərinə, eləcə də küçə ticarəti ilə məşğul
olan şəxslərə müraciət edərək, bildiririk ki, onlar da bu işlərdə fəal
olsunlar, Nazirlər Kabineti yanında Operativ Qərargahın qəbul etdiyi qərarlara
və müəyyənləşdirdiyi qaydalara ciddi şəkildə əməl etsinlər. Eyni zamanda müəyyən
olunmamış yerlərdən, yəni küçə ticarətindən istifadə etməsinlər,
sanitar-gigiyenik qaydalara əməl etsinlər”.
Sumqayıt Gigiyena və Epidomologiya Mərkəzinin direktoru
Rafiq Abdullayev isə Xeberle.com-a koronavirusun yayıldığı bir zamanda belə
halların arzuolunmaz olduğunu bildirib: "Belə hallara yol vermək olmaz. Bu problem hər zaman mövcud olub və aradan
qaldırılması vacibdir.”
Yeri gəlmişkən qeyd edək ki, qanunsuz küçə ticarətinin cəriməsi
də var.
Bu, İnzibati Xətalar Məcəlləsinin 454-cü maddəsində
("Qanunsuz küçə ticarəti" adlı maddəyə əsasən, qanunsuz küçə ticarəti,
yəni müvafiq icra hakimiyyəti orqanları tərəfindən müəyyən edilməmiş yerlərdə
malların satılmasına və ya işlərin (xidmətlərin) görülməsinə görə 80 manat cərimə
tətbiq olunur) əksini tapıb.
Xədicə Səxavətqızı
Xəbərdən istifadə edərkən istinad etmək vacibdir.