Sumqayıtda dünəndən başlayan küləkli hava şəraiti bəzi yerlərdə fəsadlara səbəb olub.

Xeberle.com-un məlumatına görə, 18-ci mkr., Çerkassı küşəsində avtomobil yolunun kənarında irigövdəli qovaq ağacının aşması nəticəsində qaz xəttinə ciddi ziyan dəyib.

Həmçinin yolda nəqliyyat vasitələrinin hərəkətinə maneə yaranıb. Xüsusən Sumqayıt Dəmiryolu Vağzalı  istiqamətində hərəkət edən sürücülər yollarını dəyişərək Koroğlu küçəsi ilə hərəkət etmək məcburiyyətində qalıblar.

Xatırladaq ki, torpaq mülkiyyətçiləri (yerli və mərkəzi icra hakimiyyəti orqanları, bələdiyyələr) mütəmadi olaraq, xüsusən payız və yaz aylarında ərazilərində olan ağacların vəziyyətini yoxlamalı, yaşıllığa zərər vurmamaq şərtiylə aqro-texniki qulluq göstərməli, gövdə ətrafı bərkitmə işləri aparmalı, eyni zamanda qurumuş, qəzalı, xəstəliklərə yoluxmuş ağac və kolların götürülməsinə rəy alınması üçün Ekologiya və Təbii Sərvətlər Nazirliyinin Dövlət Ekoloji Ekspertiza Agentliyinə müraciət etməlidirlər. Çünki ağac 1 həftəyə, 1 aya qurumur, odur ki, mütəmadi aqrotexniki qulluq göstərilməsi sayəsində həm yaşıllıqların ömrünü uzatmaq, həm də onları təhlükəsiz vəziyyətə gətirmək olar.

Elşən Yəhyayev