Həbsdə olan erməni general, qondarma Dağlıq Qarabağın keçmiş Müdafiə naziri Samvel Babayanın tərəfdarları İrəvanda aksiyaları davam etdiriblər.
Etirazçılar Ermənistan Kassasiya Məhkəməsinin binasının qarşısına toplaşaraq, Babayanla bağlı qərara etiraz ediblər. Etirazlara Ermənistan Milli Təhlükəsizlik Xidmətinin rəhbərinin keçmiş müavini Gurqen Yeqiazaryan da qoşulub. Etirazçılar həmçinin Ermənistanın Baş Prokuroru Artur Davtyanın da istefasını istəyiblər.
Aksiyalara Yelk Blokunun deputatları da qoşulub. Bloku etiraz aksiyasında Sasun Mikayelyan və Ovik Aqazaryanın təmsil etdiyi bildirilib.
Qeyd edək ki, Babayan keçən ilin noyabrında 6 il azadlıqdan məhrum edilmişdi. O, Ermənistanda dövlət çevrilişinə cəhd etməkdə şübhəli bilinərək, 22 martda tutulmuşdu. Erməni general "İqla” raketlərinin Ermənistana keçirilməsində və Ermənistan Prezidenti Serj Sərkisyana qarşı sui-qəsd təşkil etməkdə təqsirləndirilmişdi.
Babayan əslən Xankəndidəndir. Dağlıq Qarabağın Ermənistana birləşdirilməsini təbliğ edən Miatsum hərəkatının üzvlərindən biri olub. Qarabağda azərbaycanlılara və ermənilərə qarşı xüsusi əməliyyatlarda iştirak edib. 1991-ci ilin iyununda həbs edildikdən sonra 6 ay müddətində Bakıda həbsdə saxlanılıb, sonradan azadlığa buraxılıb. Babayan Xocalı, Şuşa rayonların alınmasında yaxından iştirak edib. O, həmçinin 1994-cü ildə atəşkəs müqaviləsinə imza atanlardan biri olub.

Xəbərdən istifadə edərkən istinad etmək vacibdir.