“Uşağın saxlanıldığı küvəcdə qarışqalar var idi”

Gəncənin Abbas Səhhət adına 1 saylı şəhər xəstəxanasında doğuşdan sonra bir günlük körpə dünyasını dəyişib. Bu barədə AzVision.az-a Gəncədə məskunlaşmış, Kəlbəcər rayon sakini olan və Gəncənin Gülüstan qəsəbəsində fəaliyyət göstərən B.Cəfərov adına 1 saylı Kəlbəcər tam orta məktəbinin direktoru Gülşən Nağıyeva məlumat verib.

Onun sözlərinə görə, ötən gün 6.5 aylıq hamilə olan Qarayeva Şəlalə sancı ilə həkimə gedib:

“Biz gəlini ağrılarla həkimə apardıq, lakin bizə dedilər ki, UZİ aparatından keçməlidir. Həkim Fərruxzadə Səidənin yanına getdik və o bizə hələ doğuş zamanı olmadığını dedi. Bildirdi ki, duz ağrısıdır və uşaq köndələndir. Bizə resept yazdı, evə gələrək həmin iynə dərmanı aldıq. İynədən sonra gəlinin halı daha da pisləşdi və xəstəxanaya aparan zaman yolda doğuş oldu. Doğuşdan sonra körpənin vəziyyəti yaxşı idi”.

Q.Şəlalənin qaynanası Gülşən Nağıyeva bildirir ki, onlar uşağı Gəncənin Abbas Səhhət adına 1 saylı şəhər xəstəxanasına aparsalar da, onu həkimlər qəbul etməyiblər:

“Bizi xəstəxanaya buraxmadılar. Dedilər ki, bəlkə uşaq “bicdir”. Biz onu qəbul edə bilmərik. Biz məcbur olduq təcili yardım çağırdıq. Təcili yardımın yazdığı bildirişlə, xəstəxana bizi qəbul etdi və uşağı küvəcə qoydular ki, normal tənəffüs verilsin. Biz xəstəxanaya uşağı verəndə onun vəziyyəti yaxşı idi”,-deyə G.Nağıyeva qeyd edib. 

Xəstəxanada həkimlərin laqeydliyi səbədindən körpənin ölümünü iddia edən Gülşən Nağıyeva bildirib ki, həkimlər uşağa normal diqqət etməyiblər:

“Gəlinim deyir ki, gecə yarısı uşağın saxlanıldığı otağa gedib. Orada görüb ki, körpənin saxlanıldığı küvəcdə qarışqa var. Tibb bacılara bildirib ki, küvəcdə qarışqa var, bu olmaz axı. Onlar isə deyib ki, özün təmizlə. Halbuki həmin otağa heç valideyni buraxmaq olmaz. Amma küvəcdə qarışqa var idi. Sabahısı gün isə körpə səbəbi bilinmədən öldü. Gəlinə həkimlər bildiriblər ki, qaynana de gəlib uşağı aparsın”.

Gülşən Nağıyevanın sözlərinə görə, həkimlərin bu cür davranışının səbəbi pul idi: “Dedim ki, narahat olmayın, nə qədər lazım olsa pul verəcəmyəm. Bizə nə qədər bahalı iynə, dərman aldırdılar. Amma yenə də körpəmiz öldü. İndi gəlinimin də vəziyyəti pisdir. Doğuşdan sonra psixologiyası tam pozulub”