![“Sumqayıt”ın sponsorsuz qalan, zəifləmiş rəqibi “Sumqayıt”ın sponsorsuz qalan, zəifləmiş rəqibi](/uploads/posts/2024-07/medium/1721725852_2024-07-23_13-08-59.png)
2021/22 mövsümündə UEFA Konfrans Liqasında mübarizə aparan, amma ilk mərhələdə Serbiyanın "Çukariçki” klubunun öhdəsindən gələ bilməyən "Sumqayıt”, bu dəfə azarkeşlərini sevindirmək istəyir. Rəqib isə bizə tanış olan Macarıstan "Fehervar”ıdır.
2022/23 mövsümündə bu komanda ilk oyunda "Qəbələ”ni evdə 4:1 hesabı ilə məğlub etmiş, Azərbaycanda isə minimal hesabla uduzaraq (1:2) mərhələ adlamışdı. Bəli, bu tarixlərdən uzun vaxt keçməsə də, indi nə "Sumqayıt” həmin "Sumqayıt”dır, nə də "Fehervar” həmin "Fehervar”. Arada olan "Qəbələ” də artıq I Liqaya yuvarlanıb.
Azərbaycan və Macarıstan kimi ölkələrdə aparıcı klub deyilsənsə, 1-2 ilə hər şey dəyişə bilər. Məsələn, "Qarabağ”la "Ferentsvaroş” hər il demək olar ki, aşağı-yuxarı eyni səviyyədə qalır. Amma "Sumqayıt” və "Fehervar” kimi komandalar ildən-ilə qiyafəsini dəyişir. "Sumqayıt” gözümüzün qabağında böyüdüyünə görə, pirinə də kəramətinə də bələdik. Bəs həmin dövrdən bəri "Fehervar”ın başına hansı macəralar gəlib?
Bu klub bu ilin yanvarında ciddi böhranla üzləşdi. Belə ki, "Fehervar”ın əsas sponsoru olan MOL şirkəti klubdan imtina edərək "Uypeşt” komandasına "pul buraxmaq” qərarına gəldi. Macarıstanın nüfuzlu neft-qaz şirkətinin bu addımı nəticəsində Sekeşfehervar şəhərinin komandası böhranla üzləşdi. Maraqlıdır ki, MOL aradan çıxmaqla yanaşı, komandanın baş məşqçisi Bartoş Qjelyak və iki cinah müdafiəçisi "Uypeşt”ə üz tutub.
Hazırda bu komandanı Tamaş Petö çalışdırır ki, o da işinə yeni başlayıb. Son 6 ildə Macarıstanın I Liqasında mübarizə aparan "Veszprem” klubunu çalışdıran 50 yaşlı mütəxəssis məşqçi kimi heç nəyə nail ola bilməyib. Ona görə də "Fehervar” haqda danışarkən elə dərinliklərə vara bilməyəcəyik. Hətta "Sumqayıt”ın baş məşqçisi Samir Abasov "Fehervar”ı dərindən incələyə bilmədiklərini və onlar haqda informasiya əldə etməkdə çətinlik çəkdiklərini söyləmişdi. Nəzərə alaq ki, yayda bu klubdan gedən oyunçular çox olub. Ötən mövsüm 16 qələbə, 6 heç-heçə və 11 məğlubiyyətlə 4-cü yeri tutan komanda ilə hazırkı kollektiv arasında ciddi fərq var.
Əvvəlcə, ötən mövsüm başa çatdıqdan sonra komandadan ayrılan futbolçuları nəzərdən keçirək. Bu mənada komandanın 25 yaşlı mərkəz hücumçusu Levante Sabonun Braunşveyq "Ayntraxt”ına keçidini xüsusi vurğulayaq. Bununla yanaşı, yuxarıda qeyd etdiyimiz 30 yaşlı sağ cinah müdafiəçisi Barnabaş Beşe ilə 26 yaşlı sol cinah oyunçusu Bentse Gergenyenin "Uypeşt”ə keçidi də ciddi itki sayılmalıdır. 30 yaşlı mərkəz müdafiəçisi David Siger də Rumıniyanın "Sepsi” klubuna üz tutub. 32 yaşlı portuqaliyalı dayaq yarımmüdafiəçisi Ruben Pinto isə vətənin "Torreense” klubu ilə müqavilə imzalayıb. "Fehervar” 29 yaşlı serbiyalı qapıçısı Emil Rotskovun da Bosniya və Herseqovinanın "Sarayevo” klubuna keçməsinə mane ola bilməyib. Bütün futbolçular azad agent statusu ilə klubdan ayrılıb.
Belə bir deyim var, necə salam verərsən, elə də cavab alarsan. Maliyyə böhranı yaşayan klub heyətinə də ancaq azad agent statusu əldə edən oyunçuları cəlb edib. Sponsorun gedişi ilə 800 min avro itirən klub bir oyunçuya maksimum 10 min avro məvacib ödəyirsə, başqa nədənsə danışmağa dəyməz. Amma biz yeni oyunçulardan qısaca da olsa, danışacağıq.
1984/85 mövsümündə UEFA Kubokunun finalına qədər irəliləyən və həlledici matçda "Real”a uduzan "Vidi” ləqəbli klubun yayda ən böyük transferi Macarıstanın "Kişvarda” klubunun 27 yaşlı dayaq yarımmüdafiəçisi Boqdan Melnikdir. Hərçənd bu futbolçu da Ukraynada öz sözünü deyə bilməyib və 2014-17-ci illərdə "Vorskla”da cəmi 1 oyuna çıxıb. "Zalaehersek”dən ayrılan 27 yaşlı yarımmüdafiəçi Bentse Bedi, "Puşkaş Akademiyası”nı tərk edən 26 yaşlı qapıçı Balaj Tot əsas transferlər sayıla bilər. "MTK Budapeşt”dən icarəyə götürülən 21 yaşlı hücumameyilli yarımmüdafiəçi Balaj Totla "Zalaeherseq”ə məxsus 23 yaşlı sağ cinah müdafiəçisi Andraş Huşti isə yenə də eyni statusda çıxış edəcək. Əvəzedicilərdən ibarət komandadan isə 20 yaşlı slovakiyalı yarımmüdafiəçi Bentse Kovaç əsas heyətə cəlb olunub.
Komandanın ən təhlükəli oyunçularına gəlincə, danimarkalı yarımmüdafiəçi Tobias Kristianseni xüsusi qabarda bilərik. Son hazırlıq görüşündə məhz onun dublu sayəsində "Göztəpə” ilə 2:2 hesablı heç-heçə oynadılar. Ötən il "Uypeşt”dən transfer etdikləri hücumameyilli yarımmüdafiəçi Matyas Katonanı da gözdən qoymaq olmaz. "Fehervar”ın ən təhlükəli oyunçularından biri də argentinalı hücumçu Nikolas Stefanellidir. Bu ilin qışına qədər Lionel Messi ilə birgə "İnter Mayami”də oynayan 29 yaşlı hücumçu gəlişi ilə özünü göstərə bilib.
İstənilən halda, məhz ilk oyundan sonra bu rəqibi daha yaxından tanıya biləcəyik. Görək, Samir Abasov buna qədər rəqibi necə tanıyacaq?! (futbolinfo.az)
Xəbərdən istifadə edərkən istinad etmək vacibdir.