"Sumqayıt”ın ekvadorlu yarımmüdafiəçisi Cordan Resabala ölkəsinin mətbuatına müsahibə verib.
Xeberle.com prosport.az-a istinadən həmin müsahibəni təqdim edir:
– Azərbaycana köçdükdən sonra özünüzü necə hiss edirsiniz?
– Özümü çox yaxşı hiss edirəm. Düşünürəm ki, komanda da məndən razıdır. Biz hətta rəhbərliklə müqavilə müddətinin artırılmasının mümkünlüyü barədə danışmışıq. Amma düşünürəm ki, bu barədə söz açmaq hələ tezdir. Axı, çempionat bir müddət əvvəl – avqustda başlayıb.
– Bu ölkədə liqa hansı səviyyədədir?
– Bu, Avropa yarışlarında iştirak etmək imkanı verən çox rəqabətli liqadır. Xoşbəxtlikdən Konfrans Liqasında oynamaq imkanım oldu.
– "Sumqayıt”la müqaviləniz nə vaxt başa çatır?
– Gələn ilin iyun ayına kimi Azərbaycanda olacağam.
– Başqa liqaların klublarından təklif almısınız?
– Bəli, çox adam mənimlə əlaqə saxlayıb. Qeyri-rəsmi idi, amma müqavilə müddətimi soruşdular. Təbii ki, razılaşa bilməzdim, çünki mənim menecerim və hörmət etməli olduğum müqaviləm var.
– Vaxtilə "Barselona”dan təklif almışdınız…
– Bəli, bu, "Quayakil”də yaxşı səviyyədə çıxış etdiyim vaxtlarda olmuşdu. "Barselona”nın rəsmiləri ilə danışmışdım. Ancaq başa düşdüm ki, oynamaq üçün çox imkan olmayacaq. Bu, göstərdiyim sabitliyə baxmayaraq belə olacaqdı. Bundan başqa, mənim mövqeyimdə çoxlu futbolçu var idi. Atam "Barselona”nın sadiq azarkeşidir. Ona bu klubdan maraq olduğunu söylədim və o mənə dedi: "Çox şey haqqında düşünməlisən. Məsələn, oynayıb-oynamayacağını”.
Xəbərdən istifadə edərkən istinad etmək vacibdir.
