Xəbər verdiyimiz kimi Azərbaycan Güləş Federasiyasının, Xaçmaz rayon regional gənclər və idman idarəsinin, Əlisadət Ağayev adına Qubadlı Güləş Klubunun və Xaçmaz Olimpiya İdman Kompleksinin əsasnaməsi üzrə 6 ölkənin iştirakı ilə ölkəmizdə sərbəst və qadın güləşi üzrə Beynəlxalq təlim-məşq toplanışı keçirilib. Avqustun 4-də isə toplanışda iştirak edən idmançılar Xaçmaz Olimpiya İdman Kompleksində keçirilən Qubadlı Güləş Klubunun açıq birinciliyində öz qüvvələrini sınayıblar.
Beləki Amerika, Türkiyə, Bolqarıstan, Qazaxıstan, Rusiya və ölkəmizin bir neçə klublarının 200-ə yaxın pəhləvanları yarışda iştirak edərək mükafata layiq yerlər tutublar. Komanda hesabında isə Qubadlı Güləş Klubu 1-ci, Rusiyanın Dağıstan komandası 2-ci, Amerikanın Universitet klubu isə 3-cü yerə layiq görülüb. Komandalara kuboklar təqdim olunub.
Qeyd edək ki, bu il 30 illiyini qeyd edən Azərbaycan İdman Jurnalistləri Assosiasiyasının Güləş Klubunun yetirmələri də yarışda öz qüvvələrini sınayıblar və mükafata layiq yerlər tutublar. AİJA-nın vitse-prezidenti və güləş komissiyasının sədri Ramin Allahverdiyev yarışın koordinatoru, beynəlxalq dərəcəli hakim Xəyal Əliyevə AİJA adından fəxri diplom təqdim edib.
Sonda yer tutan bütün idmançılara diplom, medal və qiymətli hədiyyələr təqdim olunub.
Xəbərdən istifadə edərkən istinad etmək vacibdir.
