Orta məktəblərdə idmanın inkişaf etdirilməsini nəzərdə tutan qanun layihəsi hazırlanacaq.”Qafqazinfo” xəbər verir ki, bu haqda parlamentin Gənclər və idman komitəsinin matın 3-də keçirillən iclasında komitə üzvü Rauf Əliyev məlumat verib.

Onun sözlərinə görə, dünyanın bir sıra ölkələrində, o cümlədən, qonşu Rusiyada artıq belə bir qanun var:

"Hesab edirəm ki, bizdə də belə bir qanunun olmasına ehtiyac var. Bu, həm uşaqlarımızın, yeniyetmələrimizin fiziki sağlamlığına, həm də istedadlı idmançı gənclərin üzə çıxmasına şərait yaratmış olacaq. Bu qanun layihəsi üzərində həm Təhsil, həm də Gənclər və İdman Nazirliyi ilə birgə işlər aparılmalıdır. Xüsusilə də, bu qanunun hazırlanmasında Təhsil Nazirliyi önəmli rol oynayır və oynamalıdır”.

Komitə sədri Fuad Muradov da deputat həmkarının təklifini dəstəkləyib və əlavə edib ki, gələn sessiyanın qanunvericilik işləri planında bu məsələ də nəzərdə tutula bilər.