Azərbaycan milli komandasının Xorvatiyaya qarşı 2020-ci il Avropa çempionatının seçmə qrup oyunu və Litva ilə keçirəcəyi yoldaşlıq görüşü üçün heyəti açıqlanıb.
Xeberle.com-un məlumatına görə, yeni baş məşqçi Nikola Yurçeviç qarşıdakı görüşlərə 23 futbolçuya şans verib. Dəvət olunan futbolçulardann 5-i legionerdir. Xaricdə çıxış edən oyunçulardan uzun müddət sonra Eddi İsrafilov da yığmaya çağırılıb.
Yeni futbolçular isə Ömər Buludov, Əli Babayev və Aleksey İsayevdir. Xorvatiyalı mütəxəssis AVRO-2020-nin seçmə mərhələsində Xorvatiya, həmçinin yoldaşlıq görüşündə Litvaya qarşı görüşdə 3 qapıçı, 8 müdafiəçi, 8 yarımmüdafiəçi, 4 hücumçunun xidmətindən yararlanacaq.
Komandamız martın 16-dan etibarən təlim-məşq toplanışına başlayacaq.
Qeyd edək ki, Xorvatiya ilə matç martın 21-də Zaqrebdəki "Maksimir" stadionunda təşkil olunacaq. Görüş Bakı vaxtı ilə saat 23:45-də başlanacaq. Martın 25-də "Bakcell Arena"da keçiriləcək yoldaşlıq görüşü isə saat 18:00-da start götürəcək.
Xəbərdən istifadə edərkən istinad etmək vacibdir.
