Azərbaycanın da  bu addımı atması anlaşılandır. Lakin  İqtisadi Tədqiqatlar Mərkəzinin  aqrar  sahə üzrə mütəxəssisi Vahid Məhərrəmov ANS PRESS-ə müsahibəsində ölkədə ixracatın təşviq edilməsi ilə yanaşı ölkədə məhsul istehsalının artırılması istiqamətində də işlərin görülməsini vacib sayır: "Sirr deyil ki, qeyri-neft ixracatında ərzaq məhsullarının payı yüksəkdir. Biz əgər ixracatı stimullaşdırmaqla yanaşı, daxili məhsul istehsalını artırmağa nail olmasaq, bu, təhlükəli nəticələr doğura bilər. Öncə əmtəəlik məhsul istehsalının stimullaşdırmasına nail olmalıyıq. Daxili istehsalın  artırılması üçün məhsuldarlığın yüksəldilməsinə böyük ehtiyac var. Bunun üçün lazımi addımlar atılmalıdır”.

Vahid Məhərrəmovun dediklərini Dövlət Gömrük Komitəsinin təqdim etdiyi statistika da təsdiq edir. Statistikaya görə, 2015-ci ildə Azərbaycandan ixrac edilmiş 1 milyard 605 miylon dollarlıq qeyri-neft məhsulunun 722 milyon dollarını yeyinti məhsulları təşkil edir. Bu məhsullardan yalnız meyvə-tərəvəz (312 miylon dollar) və spirtli içkilər (26 milyon dollar) Azərbaycanda istehsal edilir. Çay (19 milyon dollar), yağ (153 milyon dollar)  və şəkər (212 miylon dollar) ixracatı isə xaricdən gətirilərək Azərbaycanda qablaşdırılmış məhsulların hesabına gerçəkləşdirilir.

Bu məhsulların hətta qablaşdırıldığı şüşə və karton məmulatlar belə ölkəyə xaricdən gətirilir. Təbii ki, bu cür məhsulların ixracına şamil olunacaq təşviq vəsaitlərinin Azərbaycanın qeyri-neft sektoruna heç bir dəxli olmayacaq. Hökumət fərmanın tətbiqi zamanı bu kimi nüansları nəzərə almalıdır.