Son günlər ölkədə dollar milli valyuta olan manata qarşı zəifləyir.
Aprelin 1-də ABŞ dollarının Azərbaycan manatına nisbətdə növbəti ucuzlaşması qeydə alınacaq. Azərbaycan Mərkəzi Bankının sabaha müəyyən etdiyi məzənnə belə deməyə əsas verir. Qeyd edək ki, aprelin 1-də 1 ABŞ dolları 1,5238 AZN səviyyəsində müəyyən olunub. Bu gün isə dollar 1,5421 manata bərabər idi. Bu, gündəlik 1,19% azalma deməkdir.  
İqtisadçı-ekspert Arzu Qafarlı hesab edir ki, ABŞ-ın Federal Ehtiyatlar Sistemi son iclasında açıqladığı müsbət qərarlar, dünyada dolların düşməsinə səbəb olub: "Manat 21 dekabr 2015-ci ildən bu günədək ilk dəfə 1.52 manat olub. Sürətlə olmasa da, amma cüzi nisbətdə dolların hər gün zəifləməyinin şahidi olacağıq. Sonrakı aylarda isə (yayı və "Formula 1” yarışlarını nəzərə almaqla) istirahət üçün ölkəmizə gələn turistlərin sayı artacaq. Bu vəziyyət dolların bazardakı təklifini yüksəldəcək. Təklifin yüksəlməsi isə, manatın möhkəmlənməsinə təkan verəcək.” 
A.Qafarlı bütün bu proseslərin istehsala bir sözlə bütün iqtisadi nöqtələrə təsir edəcəyini deyir: "Manatın möhkəmlənməsi insanlarda manata qarşı inam yaradacaq və onlar dollardan imtina etməyə başlayacaqlar. Əllərindəki vəsaiti yenidən manata çevirərək dövriyyəyə buraxacaqlar.”

İqtisadçı-ekspertin sözlərinə görə bu proseslər daşınmaz əmlak bazarına, eləcə də bank sektoruna da müsbət təsir edəcək: "Əsasəndə əmlak bazarında yenidən canlanma hiss olunacaq. Tikinti üçün yenidən lazımı materiallar alınacaq. Canlanma bank sektorundada hiss olunacaq. Kredit ödənişlərində indiki vəziyyətə nisbətən ödənişlər çoxalacaq. Bu proses uzun müddət davam edərsə müştəri bank arasında yaranmış olan gərgin münasibət aradan qalxacaq.”
Xeberle.com