Bu günlərdə Azərbaycan Aşıqlar Birliyinin sədri , Əməkdar Elm Xadimi, Dövlət mükafatı laureatı, "Şöhrət” ordenli professor Məhərrəm Qasımlının təşəbbüsü ilə, Sumqayıt şəhərindəki Muğam Mərkəzində AAB-nin Sumqayıt Regional Bölməsinin aşıqlarının iştirakı ilə baş tutan Konsert proqramı uğurla həyata keçdi.

Azərbaycanın Dövlət Himni səsləndikdən sonra, tədbirin təşkilatçısı və aparıcısı, AAB SRB-nin "Mətbuat və ictimaiyyətlə əlaqələndirici”si, həmçinin AJB və AYB-nin üzvü, jurnalist, yazıçı-publisist Aygün Hacıyeva tədbiri açaraq qonaqları salamladı. Daha sonra Azərbaycanın azadlığı və ərazi bütövlüyü uğrunda canlarından keçən qəhrəman oğulların – Şəhidlərin əziz xatirəsi bir dəqiqəlik sükutla yad edildi.

A.Hacıyeva əvvəl Aşıq sənətinin inkişaf tarixindən, AAB-nin yaranmasından və fəaliyyətindən qısaca məlumat verdi. O, konsertin həyata keçirilməsi üçün şərait yaradan və dəstəyini əsirgəməyən Sumqayıt Şəhər İcra Hakimiyyətinin başçısı cənab Zakir Fərəcova, Abşeron-Xızı Regional Mədəniyyət İdarəsinin rəhbəri Ramil bəyə, Muğam Mərkəzinin rəhbərliyinə, həmçinin bu işdə əməyi olanlara təşəkkür etdikdən sonra, səhnəyə AAB-nin sədri Məhərrəm Qasımlını dəvət etdi.

Məhərrəm Qasımlı Azərbaycan musiqisinin bir qolu olan Aşıq sənətində öz sözünü demiş ustad aşıqları xoş xatirəylə yad etdi. O, Dövlətimiz tərəfindən bu sənətə olan diqqəti nəzərə çatdıraraq bildirdi ki, Azərbaycan Aşıq yaradıcılığı 2009-cu ildə UNESCO-nun Qeyri-maddi Mədəni İrsin Reprezentativ Siyahısına daxil edilmişdir və bu, çox böyük uğurdur.

 SRB-nin ustad aşıqlarından bölmənin rəhbəri Çərkəz Qurbanov, Aşıq Abbas Zərgər və Aşıq Azər Fərmayıloğlu Məhərrəm Qasımlı tərəfindən AAB-nin "USTAD SƏNƏTKAR” medalına layiq görüldüyündən, mükafatları təqdim etmək üçün, AAB-nin sədr müavini, Azərbaycan Dövlət Mədəniyyət və İncəsənət Universitetinin dosenti, aşıq-şair Altay Məmmədov və AAB-də şöbə müdiri işləyən aşıq Şahniyar Əliyev səhnəyə dəvət olundular. Təltif olunanlar göstərilən diqqətə görə, AAB-nin rəhbərliyinə öz dərin təşəkkürlərini bildirdilər.

Konsert proqramında iştirak edən aşıqlardan Çərkəz Qurbanovun (SRİ-nin sədri) və Mehman Abbasovun (SRİ-nin sədr müavini), Şəhriyar Şahverdinin (SRİ-nin Abşeron rayonu üzrə rəhbəri), Sərdar Məmmədlinin (Azərbaycanın Əməkdar Mədəniyyət işçisi) və İlqar Ələkbərin, Nəriman Aslanoğlunun, Famil Laçınlının və Sahil Laçınlının, Nəcəf Kəlbəcərli ilə Əfsanə Cəlilovanın, Həvva Qazaxlının və Zəminə Laçınlının, Xəqani Kəlbəcərlinin və Xanım Göyçəlinin, Kəmalə Qubadlı ilə Ceyhun Nağıyevin, Ədalət Gədəbəylinin və Təbriz Gədəbəylinin, Azər Fərmayıloğlunun və Sayad Qubadlının, Abbas Zərgərin, Aşıq Cahangirin, həmçinin gənc aşıq Cahid İlyaslının çıxışları tamaşaçılar tərəfindən alqışlarla qarşılandı.

Tədbir zamanı aşıq sənətinin vurğunu olan iki məktəbli – Aşıq Həvva xanımın nəvəsi, 6-cı sinif şagirdi Leyla Nəsibli və müxtəlif nominasiyalar üzrə bir çox müsabiqələrin qalibi olmuş, 4-cü sinif şagirdi Leyla Məmmədova tərəfindən (solo saz ifaları zamanı) Vətənə, Şuşaya, Şəhidlərimizə… həsr olunmuş şeirlər səsləndi.

Vətən müharibəsi şəhidlərinin valideynləri; şəhid Rauf İbadovun atası Məhərrəm İbadovun, şəhid Səbuhi Həsənquliyevin anası, şair Mayisə xanımın, şəhid Şamil Nəcəfovun anası Gülşən müəllimənin, həmçinin şəhid ailələrinin üzvlərinin, qazilərin, əmək və müharibə veteranlarının iştirakı konsertə xüsusi rəng qatdı. Mayisə xanım şəhid ailələri adından çıxış edərək, belə bir proqramın yüksək səviyyədə hazırlanmasına və dəvətə görə, Məhərrəm Qasımlı başda olmaqla, kollektivə dərin təşəkkürünü bildirdi və öz şeirlərindən birini səsləndirdi.

 Sonda Aşıqlar ansablının (xor) ifasında "Ağrın alım” və "Azərbaycan” mahnısı oxundu.

Uğurla başa çatan Konsert proqramı şəkillərin çəkilməsi ilə tarixin yaddaşına həkk olundu.

Tədbirdə şəhər İcra Hakimiyyətinin və Abşeron-Xızı Regional Mədəniyyət İdarəsinin, həmçinin ictimaiyyət və media nümayəndələri, idarə, təşkilat və müəssisə rəhbərləri öz kollektivləri ilə, QHT rəhbərləri və üzvləri, qələm adamları… - bir sözlə, saz-söz aşiqləri, aşıqsevərlər iştirak edirdi.

Baş tutan Konsert proqramı bir daha əminlik yaratdı ki, Azərbaycanın hər qarışında Aşıq sənətinə və bu sənəti yaşadan el aşıqlarına böyük hörmət, ehtiram, ən əsası isə, tükənməz sevgi var.

P.S.: Biz də, öz növbəmizdə, uğura imza atan AAB-nin Sumqayıt Regional Bölməsinin kollektivini ürəkdən təbrik edir, gələcək addımlarında bol nailiyyətlər diləyirik!

Səsiniz zirvələrdən gəlsin, EL Aşıqları!!!