Bəli, Ümummilli Liderimiz Heydər Əliyevin başladığı işlər bu gün respublikanın Prezidenti İlham Əliyev tərəfindən yüksək səviyyədə davam etdirilir. Tariximizin şanlı səhifəsinə ən möhtəşəm iyirmi bir il kimi yazılan ötən dövrdə Azərbaycanda baş verən iqtisadi inkişaf və dövlətin maliyyə potensialının artması tibb müəssisələrinin yenidən qurulmasına imkan yaratdı. Yeni səhiyyə ocaqlarının tikintisi, müasir səviyyədə qurulması və tibbi avadanlıqların yenilənməsi prosesi həyata keçirildi.

Ötən illər ərzində Prezident İlham Əliyevin rəhbərliyi altında regionlarda da bu istiqamətdə mühüm layihələr reallaşdırıldı, səhiyyə infrastrukturu yenidən quruldu. Əhaliyə göstərilən tibbi xidmətin səviyyəsinin yüksəlməsi, sağlamlığının qorunması sahəsində mühüm irəliləyişlər əldə olundu.

İlham Əliyev prezident kimi Sumqayıta ilk səfərində yeni tibb müəssisəsinin açılışını etdi

Azərbaycan Respublikasının Prezidenti cənab İlham Əliyev 2005-ci il avqustun 12-də Sumqayıt şəhərinə səfəri zamanı bir çox mühüm obyektlərin açılışında iştirak etdi. Dövlət başçısı həmçinin şəhərdə yeni fəaliyyətə başlayan özəl tibb müəssisəsinə də baş çəkdi. "Real-Med” diaqnostika sağlamlıq mərkəzi ilə tanış oldu. Həmin dövrdə "Real”ın baş həkimi işləyirdim. Möhtərəm Prezidentimizi böyük hörmət və ehtiramla qarşıladıq, ona gül dəstəsi təqdim edildi.

Prezident əvvəlcə tibb mərkəzinin foyesində "Müasir Azərbaycan Respublikasının banisi Heydər Əliyev və səhiyyə” guşəsinə baxdı. Baş həkim kimi məlumat verdim ki, ginekoloji təmayüllü bu tibb mərkəzi müasir avadanlıqlarla təchiz olunmuşdur. Mərkəzin 70 əməkdaşı ambulatoriya şəraitində, habelə 30 çarpayılıq stasionarda qadınlara yüksək ixtisaslı xidmət göstərəcəkdir. Yeni mərkəzin tibb heyəti texnika və avadanlıq təqdim etmiş xarici firmaların nümayəndələri ilə üç ay ərzində məşğələlər keçmişdir.

Dövlətimizin başçısı mərkəzin poliklinikasındakı funksional diaqnostika, fizioterapiya, nevrologiya, oftalmologiya kabinetləri ilə, habelə müxtəlif laboratoriyalarla tanış oldu. Mərkəzin ikinci mərtəbəsində yerləşən stasionardakı doğum şöbəsinin yaxşı təchiz olunmuş palatalarını, əməliyyat otaqlarını gəzdi, yeni doğulmuş körpələrə baş çəkdi.

Möhtərəm Prezidentimizin bizimlə keçirdiyi görüş əsl bayram təntənəsini xatırlatdı. Ölkə başçısının tövsiyə və tapşırıqları isə hər birimiz üçün fəaliyyət proqramı oldu.

Xəstəxanalarımız yenidən quruldu

Prezident İlham Əliyevin ölkə səhiyyəsini inkişaf etdirmək səylərində əsas prioritetlərdən biri köhnəlmiş səhiyyə müəssisələrinin yenidən qurulması və müasir tibb avadanlıqları ilə təchizatı oldu. Ötən dövr ərzində 1 və 2 nömrəli şəhər xəstəxanaları, təcili tibbi yardım xəstəxanası yenidən quruldu. Bu müalicə ocaqlarının yenidənqurmadan sonra istifadəyə verilməsi şəhər sakinlərinin keyfiyyətli səhiyyə xidmətindən rahat istifadəsinə kömək etdi.

Vurğuladığım kimi, Prezident İlham Əliyev sonrakı illərdə də Sumqayıtdan və sumqayıtlılardan qayğısını əsirgəməmişdir. Səhiyyə sahəsinə də xüsusi diqqət ayırmışdır. Uzun illər istismarda olan 1 nömrəli şəhər xəstəxanasının yenidən qurulması bunun bariz nümunəsidir. Dövlətimizin başçısı 2013-cü il oktyabrın 3-də sözügedən tibb müəssisəsində aparılan əsaslı təmir və yenidənqurma işləri ilə tanış oldu, xəstəxananın kollektivi və Sumqayıt ictimaiyyətinin nümayəndələri ilə görüşdü. Qeyd olundu ki, səhiyyə müəssisələrinin təmiri və bərpası, ən müasir avadanlıqla təchiz edilməsi, vətəndaşların pulsuz dərman preparatları ilə təmini, müalicəsi, regionlarda diaqnostika mərkəzlərinin tikilərək istifadəyə verilməsi, uşaqların bütün növ tibbi xidmətlərlə ən yüksək səviyyədə əhatə olunması bu sahədə islahatların əsasını təşkil edir. Bu məqsədlə regionlarda da əhalinin tibbi xidmətlərlə keyfiyyətli şəkildə təmin olunması üçün bütün növ müayinə və müalicəni, əməliyyatları həyata keçirməyə imkan verən yeni müəssisələr yaradılır.

1 nömrəli xəstəxananın yenidənqurmadan sonra istifadəyə verilməsi şəhər sakinlərinin keyfiyyətli səhiyyə xidmətindən rahat istifadəsinə daha çox kömək etmişdir. Doğum evinin və qadın məsləhətxanasının binaları da əsaslı təmir olunmuşdur.

2 saylı Sumqayıt şəhər xəstəxanası da uzun müddət istismar olunması nəticəsində əhaliyə keyfiyyətli tibbi xidmət göstərmək gücündə deyildi. Xəstəxananın yararsız vəziyyətdə olması bu tibb müəssisəsinin yenidən qurulmasını zəruri edirdi. Bunu nəzərə alaraq Prezident İlham Əliyev xəstəxananın yenidən tikilməsi və zəruri tibbi avadanlıqlarla təchiz edilməsi haqqında Sərəncam imzaladı. 2019-cu ildə tikinti işlərinə başlanıldı. Qısa müddət ərzində xəstəxana tikilərək şəhər sakinlərinin istifadəsinə verildi.

2023-cü il oktyabrın 23-də Prezident İlham Əliyev 2 saylı xəstəxananın yeni binasının açılışını etdi. Xəzərin sahilində yerləşən bu tibb müəssisəsi indi yeni həyatını yaşayır. 150 çarpayılıq xəstəxananın bina və qurğuları 6,1 hektar sahədə inşa edilib.

Xəstəxana poliklinika, təcili tibbi yardım, otuz çarpayılıq terapiya, otuz çarpayılıq cərrahiyyə, şüa diaqnostika, hemodializ, oftolmologiya, endokrinoloji terapiya, endokrinoloji cərrahiyyə, nevrologiya, on çarpayılıq əməliyyat bloku, reanimasiya və sair şöbələrdən, həmçinin laboratoriyadan, digər tikili və qurğulardan ibarətdir.

Müalicə ocağı müasir tələblərə cavab verən və böyük vəsait tələb edən tibbi avadanlıqlar - çoxkəsikli kompüter tomoqrafiyası (KT), rəqəmsal teleskopik rentgen cihazı, rəqəmsal DR rentgen qurğusu, oftalmoloji müayinə üçün mikroskop, oftalmoloji cərrahi əməliyyatlar üçün PHACO AMO cihazı və iki ədəd rəqəmsal stasionar ultrasəs müayinə cihazı ilə təchiz olunub.

Koronavirusla effektiv mübarizə aparmaq üçün modul tipli xəstəxana yaradıldı

2020-ci ilin əvvəllərindən başlayaraq bütün dünyanı amansız koronavirus cənginə götürmüşdür. Bəşəriyyətin elə bir guşəsi - ölkəsi yox idi ki, orada yaşayan saysız-hesabsız insan bu virusun qurbanına çevrilməsin. Çoxsaylı insan virusa bu və ya digər dərəcədə yoluxmasın. Amansız ölüm neçə-neçə insanın yolunu yarıda qoydu. Bir anlığa keçmişə qayıdaq. Xəstəliyin yayılmasının qarşısını almaq məqsədilə möhtərəm Prezidentimiz müsbət yönümlü bütün tədbirlərə əl atdı. Məlum oldu ki, mikroblardan qorunmaq üçün maska və digər xüsusi vasitələrə ehtiyac vardır. Bu məqsədlə Sumqayıt Kimya Sənaye Parkında "Bakı Texstil Fabriki” MMC tərəfindən tibbi maska istehsalı müəssisəsi yaradıldı və 2020-ci il aprelin 6-da istifadəyə verildi.

Açılışda möhtərəm Prezident İlham Əliyev və Birinci vitse-prezident Mehriban Əliyeva iştirak etdilər.

Koronavirusla daha effektiv mübarizə aparmaq üçün yeni infrastrukturun yaradılması zərurəti də yarandı. Prezident İlham Əliyevin tapşırığı əsasında qısa müddət ərzində Bakıda, Abşeronda və Sumqayıt şəhərində modul tipli xəstəxanalar tikildi. 2020-ci il iyunun 9-da Prezident İlham Əliyevin və birinci xanım Mehriban Əliyevanın iştirakı ilə şəhərimizdə qurulan Modul tipli xəstəxananın açılışı oldu.

Koronavirus xəstələrinin qəbulu və müalicəsi üçün bura hər cür şəraitlə təmin edildi və mərkəzləşdirilmiş oksigen generator sistemi ilə təchiz olundu. Xəstəxanaların açılışı respublikamızda pandemiyanın qarşısının alınmasında mühüm əhəmiyyət kəsb etdi. Ölüm halları aşağı həddə çatdırıldı.

Tibb işçilərimiz koronavirus infeksiyası ilə mübarizə tədbirlərinin önündə oldu.

Yeni hədəflərə doğru

Ana və uşaqlara göstərilən tibbi xidmətin keyfiyyətinin yaxşılaşdırılması dövlətin sosial yönümlü siyasətinin əsas prioritet istiqamətlərindən biridir. Sumqayıtda da müasir səviyyədə qurulmuş tibb müəssisələri əhaliyə nümunəvi xidmət göstərir. Doğum evlərimizdə gələcəyimiz olan uşaqların sağlam dünyaya gəlməsi, lazımi tibbi yardım almaları üçün bütün şərait vardır. Hər zaman tibbin yeniliklərinə açıq olan Sumqayıt Perinatal Mərkəz bu gün həm də tədris mərkəzi kimi fəaliyyət göstərir.

Təqdirəlayiqdir ki, "Ana və uşaqların sağlamlığının yaxşılaşdırılmasına dair 2014-2020-ci illər üçün Dövlət Proqramı”nda və digər Tədbirlər Planında bu sahədə tibbi xidmətlərin keyfiyyətinin yüksəldilməsi və kadr hazırlığının gücləndirilməsi məqsədilə regionlarda perinatal mərkəzlərin yaradılması, xəstəxanaların maddi-texniki bazasının möhkəmləndirilməsi, tibb işçilərinin peşəkarlığının artırılması, həmçinin artıq yarımçıq və vaxtından əvvəl doğulmuş, perinatal patologiyalı uşaqların dünyaya gətirilməməsi üçün zəruri şəraitin yaradılması məsələləri öz əksini tapmışdır. Bu zəmindən 65 ildən çox əhaliyə xidmət göstərən 1 saylı şəhər doğum evi də 2017-ci ilin dekabr ayından Perinatal mərkəz kimi perinatal patologiyalı uşaqları qəbul etməklə onlara tibbi yardım göstərilir. Nəticədə şəhərimizdə körpə, həmçinin ana və uşaq ölümünün səviyyəsinin kəskin aşağı düşməsinə nail olmuşuq. Bəli, bu işdə təkcə səriştəli həkimlər, tibb işçiləri deyil, eyni zamanda, burada maddi-texniki bazasının yüksək olması, tənəffüs dəstəyi avadanlıqlarının mövcudluğu böyük rol oynayır.

Məlumdur ki, 2021-ci ildən icbari tibbi sığorta sisteminin icrasına başlanmışdır. Bu, ilk növbədə, əhali məmnunluğu və vətəndaş əlçatanlığı üçün olduqca əlverişli sistemdir.

Tibbi xidmətin keyfiyyəti ildən-ilə yaxşılaşır

Xüsusilə son on illik ərzində Sumqayıt şəhərində tibb xidmətinin keyfiyyətinin yaxşılaşdırılması, müasir tələblərə cavab verən səhiyyə infrastrukturunun yaradılması istiqamətində önəmli işlər görülmüşdür. Şəhərdə fəaliyyət göstərən tibb ocaqlarının əksəriyyəti təmir olunmuş, müasir avadanlıqlarla təchiz edilmişdir.

Tibb işçiləri hər zaman ölkə başçısının və şəhər rəhbərinin diqqət mərkəzində olub. Ötən dövr ərzində onlarla əməkdaşımız Prezident İlham Əliyev tərəfindən mükafatlandırılıb. Əmək fəaliyyətləri yüksək qiymətləndirilib.

Sumqayıt şəhər İcra Hakimiyyətinin başçısı Zakir Fərəcov tərəfindən də hər zaman diqqət və qayğı ilə əhatə olunmuşuq. Şəhər rəhbəri mütəmadi olaraq tibb işçiləri ilə görüşür, onların problemləri ilə maraqlanır, tibb müəssisələrindəki mövcud vəziyyətlə yerində tanış olur.

Son illər Sumqayıt şəhərində tibb sahəsinə göstərilən diqqət bu sahənin bundan sonra da sürətlə inkişaf edəcəyinə əminlik yaradır. İnanırıq ki, yaxın gələcəkdə səhiyyə sahəsində daha çox inkişafın, yeni-yeni layihələrin reallaşmasının şahidi olacağıq.

Təranə RƏCƏBLİ,

Sumqayıt Tibb Mərkəzinin direktor müavini,

Perinatal Mərkəzin

baş həkimi, Əməkdar həkim