![Ərdoğanın komandası toplaşır: Azərbaycan da müzakirə ediləcək Ərdoğanın komandası toplaşır: Azərbaycan da müzakirə ediləcək](/uploads/posts/2024-07/medium/1721885051_d98e18ca-dcb3-3203-9e9d-984e2b680ebb_850.jpg)
Türkiyənin Milli Təhlükəsizlik Şurası iki aylıq fasilədən sonra bu gün yenidən bir araya gələcək.
Xeberle.com xəbər verir ki, Türkiyə Prezidenti Rəcəb Tayyib Ərdoğanın sədrliyi ilə keçirilən iclas Beştəpə sarayında baş tutacaq.
Görüşdə Türkiyənin sərhədyanı terrorla mübarizə əməliyyatları, Suriya ilə normallaşma prosesi, Qəzzadakı müharibə gündəmin əsas mövzuları olacaq. Şimali İraqda PKK hədəflərinin məhv edilməsi üçün həm qurudan, həm də havadan davam edən əməliyyatlar, atılacaq digər addımlar müzakirə olunacaq. Şura üzvləri FETÖ və İŞİD kimi digər terror təşkilatları ilə mübarizədə son vəziyyətlə bağlı məlumat verəcəklər.
Suriyada daimi sülh və sabitliyin yaradılması və Dəməşq administrasiyası ilə diplomatik əlaqələrin bərpası barədə fikir mübadiləsi aparılacaq. Qəzzada atəşkəsin təmin edilməsi, humanitar yardımların fasiləsiz çatdırılması və digər məsələlər müzakirə olunacaq.
Məlumata görə, il ərzində keçiriləcək 4-cü iclasda Azərbaycan və Ermənistan arasında sülh prosesinə də yer veriləcək. Kiprdəki hadisələr və Yunanıstanla münasibətlər kimi digər regional və beynəlxalq məsələlər gündəmdə olacaq.
Türkiyə Prezidentinin milli təhlükəsizlik, hərbi və xarici siyasət məsələlərinin yüksək səviyyəli milli təhlükəsizlik rəsmiləri ilə müzakirə etdiyi Milli Təhlükəsizlik Şurasında vitse-prezident, ədliyyə, daxili işlər, xarici işlər və milli müdafiə nazirləri, Baş Qərargah rəisi, quru, dəniz və hava qüvvələrinin komandirləri iştirak edir. Jandarma Baş Komandanı, Sahil Mühafizəsi Komandiri, Milli Kəşfiyyat Təşkilatının Rəhbəri və Prezidentin Kommunikasiya Direktoru mütəmadi toplantılara qatılır. Görüşlərdə Türkiyənin milli təhlükəsizliyinə təsir edən məsələlər müzakirə olunur.
Xəbərdən istifadə edərkən istinad etmək vacibdir.