"Ermənistan Kollektiv Təhlükəsizlik Müqaviləsi Təşkilatından çıxmaq istəyir. Nikol Paşinyan Ermənistan dövlətinin gələcəyini Rusiyadan asılı görmür".
Bunu açıqlamasında politoloq Zaur Məmmədov deyib. O bildirib ki, Paşinyan baş nazir olmamışdan əvvəl blokunun adı "Çıxış" idi:
""Çıxış" isə o deməkdir ki, Kollektiv Təhlükəsizlik Müqaviləsi Təşkilatı və Rusiyadan birbaşa idarə olunan hərbi-siyasi təşkilatlardan uzaq olmaq. Bunun əksi isə Ermənistanı Avropaya yaxınlaşdırmaqdır. İndiki halda Paşinyan Kollektiv Təhlükəsizlik Müqaviləsi Təşkilatı ilə bağlı qərar verərsə, bu, radikal qərarın verilməsi sayılacaq. Çünki 2026-cı ildə Ermənistanda seçkilər olacaq. Görünən odur ki, həm Ermənistan, həm də Rusiya rəhbərliyi bir-birinə qarşı sərt ritorikalardan istifadə edə bilər. "Taşir” şirkətlər qrupunun sahibi Samvel Karapetyanın həbs edilməsi, erməni kilsəsi ilə bağlı Ermənistan siyasi hakimiyyətinin apardığı addımlar, Rusiya tərəfindən bütün bunlarla bağlı verilən açıqlamalar onu göstərir ki, seçkilər öncəsi tərəflər arasında soyuq müharibə başlayıb. Düzdür, Paşinyanın digər yolu da var. O apardığı siyasətdən imtina edərək Rusiya ilə yaxınlaşa bilər. Hələki bu qərarın verilməsi gecikməyib. Belə bir ehtimal da var. Amma Ermənistan rəhbərinin aldığı məlumatlar, Samvel Karapetyanın siyasi məsələlərə qoşulması, kilsənin atdığı addımlar, eyni zamanda son dövrlər erməni müxalifətinin aktivliyi ondan xəbər verir ki, Paşinyanda da məlumatlar var . Belə ki, Rusiya onun hakimiyyətdən getməsi üçün digər yollara əl atmağı hədəfləyib.".
Politoloq qeyd edib ki, Paşinyan 2026-cı il seçkilərinə qatılacaq. Onun sözlərinə görə, həmin seçkilərə qədər ciddi şəkildə Cənubi Qafqazdakı proseslərə, müdaxilələrə şahidlik edəcəyik:
"Bu artıq "ölüm-dirim" mübarizəsi sayıla bilər. Çünki Rusiya-Ukrayna arasında davam edən müharibə, müharibədən sonra status-kvonun saxlanılması ilə mübahisəli məsələlərin dondurulması diqqəti Cənubi Qafqaza, Azərbaycana və Ermənistana yönəldəcək. Sözsüz ki, burada ABŞ-ın Cənubi Qafqazla bağlı siyasətinin nə qədər davamlı olub-olmaması məsələsi gündəmdə olacaq. Həmçinin, Rusiya və ABŞ-ın Ermənistanı və ümumilikdə Cənubi Qafqazla bağlı hansı qərarlar verməsindən də asılı olacaq. Bir məsələni Paşinyan əminliklə bilir ki, onun təhlükəsizliyi birbaşa olaraq Türkiyə və Azərbaycandan asılıdır. Nə ABŞ, nə Rusiya, nə də digər üçüncü qüvvə bu təhlükəsizliyə qarant ola bilməz. Ümumiyyətlə, Ermənistanın gələcəyi onun Türkiyə və Azərbaycanla bağlı apardığı yanaşmadan asılı olacaq".
Xəbərdən istifadə edərkən istinad etmək vacibdir.
