Prezident İlham Əliyevin çıxışında diqqət çəkilən əsas məsələlərdən biri Kəlbəcərin strateji mövqeyi ilə bağlı idi. Rayonun həm təbii sərvətləri, həm də coğrafi əhəmiyyəti Azərbaycan üçün xüsusi dəyərə malikdir. İşğaldan əvvəl də Kəlbəcər bölgəsi ölkənin ən zəngin təbii su ehtiyatlarına, mineral bulaqlarına və geniş yaylaqlarına görə seçilirdi. Məhz bu səbəbdən də Kəlbəcərin bərpası və inkişafı dövlətin prioritet istiqamətlərindən birinə çevrilib. Prezident İlham Əliyev çıxışında qeyd etdi ki, Kəlbəcərdə görülən işlər təkcə bir rayonun inkişafı deyil, bütövlükdə Azərbaycanın iqtisadi gücünün artması deməkdir.

Prezident İlham Əliyevin 2024-cü il sentyabrın 2-də Kəlbəcərə səfəri rayonun gələcək inkişaf yolunda mühüm başlanğıc oldu. Həmin səfərdə dövlət başçısı bir sıra əlamətdar tədbirlərdə iştirak edərək, bərpa və quruculuq işlərinə şəxsən rəhbərlik etdi.

O gün açılışı edilən "Yuxarı Vəng” Su Elektrik Stansiyası Kəlbəcərin və bütövlükdə Qarabağ bölgəsinin enerji təminatında mühüm rol oynayacaq obyektlərdən biri kimi dəyərləndirilir. Alternativ enerji layihələrinin reallaşması həm ekoloji baxımdan, həm də iqtisadi baxımdan ölkəmiz üçün əhəmiyyətlidir.

Prezident İlham Əliyev həmçinin Xudavəng monastır kompleksinə baxış keçirərək Azərbaycanın zəngin tarixi-mədəni irsinə dövlət səviyyəsində göstərilən qayğını bir daha nümayiş etdirdi. Bu, həm də ölkəmizin işğaldan azad edilmiş torpaqlarda mədəni irsi bərpa və qorumaq siyasətinin bariz nümunəsidir.

Həmin səfərdə dövlət başçısı Toğanalı-Kəlbəcər-İstisu avtomobil yolu layihəsi çərçivəsində inşa olunan tunellərə və yol hissələrinə baxış keçirib. Bu yolun istifadəyə verilməsi Kəlbəcərin həm iqtisadi, həm də turizm potensialının açılmasına xidmət edəcək.

Sosial infrastruktur sahəsində də mühüm addımlar atılmışdı. Kəlbəcər şəhərində ikinci yaşayış kompleksinin təməli qoyuldu, inzibati bina və 524 ailəlik yaşayış kompleksinin tikintisinə başlanıldı. Bütün bunlar köçkünlərin doğma torpaqlarına qayıdışı üçün yaradılan şəraitin bir hissəsidir.

Təhsil sahəsinə də diqqət ayrıldı. Kəlbəcər Şəhər Təhsil Kompleksində aparılan işlər və yeni modul tipli məktəb layihəsi ilə tanışlıq göstərdi ki, rayonun bərpası yalnız infrastruktur və iqtisadi obyektlərlə məhdudlaşmır, həm də gələcək nəsillərin savadlı və bilikli yetişməsi üçün şərait yaradılır.

2024-cü ilin həmin səfərində "İstisu” mineral su zavodunun açılışı, "Zar” və "Toğanalı” kiçik su elektrik stansiyalarının istifadəyə verilməsi, "İstisu” yarımstansiyasının açılışı və digər layihələr Kəlbəcərin gələcək iqtisadi simasını formalaşdırdı.

Ən mühüm məqamlardan biri də İstisu qəsəbəsinin təməlqoyma mərasimi oldu. Tarixən Azərbaycanın tanınmış müalicə-istirahət mərkəzi olmuş İstisu, yaxın illərdə regionun turizm mərkəzinə çevriləcək.

Bir il sonra – 2025-ci il avqustun 21-də Prezident İlham Əliyevin Kəlbəcərə səfəri isə artıq görülən işlərin real nəticələrini əks etdirdi. Dövlət başçısı çıxışında qeyd etdi ki, Böyük Qayıdış proqramı sadəcə layihə deyil, artıq gerçəkləşən reallıqdır. Köçkünlərin mərhələli şəkildə öz torpaqlarına qayıtması, sosial infrastrukturun istifadəyə verilməsi və iqtisadi layihələrin ardıcıl həyata keçirilməsi bu reallığın göstəricisidir.

Prezident İlham Əliyev vurğuladı ki, yaxın illərdə Kəlbəcər regionu həm Azərbaycanın enerji təhlükəsizliyinə, həm də iqtisadi inkişafına mühüm töhfələr verəcək. Burada yeni yaşayış massivləri, müasir kənd təsərrüfatı təsərrüfatları, alternativ enerji layihələri və turizm mərkəzləri fəaliyyət göstərəcək. Bu isə təkcə Kəlbəcərin deyil, ümumilikdə Qarabağ və Şərqi Zəngəzurun inkişafına xidmət edəcək.

Prezident İlham Əliyevin Kəlbəcərə hər bir səfəri Böyük Qayıdış proqramının uğurla icra olunduğunu təsdiqləyir. 2024-cü ildə başlanmış layihələr 2025-ci ildə öz real bəhrəsini verir. Kəlbəcər artıq yeni həyatın rəmzinə çevrilib. Dövlət başçısının dediyi kimi, Azərbaycan xalqı öz doğma torpaqlarında əbədi yaşayacaq və Kəlbəcərin hər bir guşəsi müasir, abad və güclü Azərbaycanın simasını əks etdirəcək.