Noyabrın 1-də keçiriləcək parlament seçkiləri ilə bağlı Yeni Azərbaycan Partiyasının (YAP) apardığı təbliğat-təşviqat kampaniyası uğurla davam etdirilir. 42 saylı Sumqayıt ikinci Seçki Dairəsindən YAP-ın namizədi Tahir Mirkişilinin şəhərin 4-cü mikrorayonunun seçiciləri ilə görüşü keçirilib. 
Tədbirdə çıxış edən YAP Sumqayıt şəhər təşkilatının sədri Asif İmaməliyev qarşıdan gələn parlament seçkiləri ilə bağlı məlumat verib. Bütün seçiciləri noyabrın 1-də seçki məntəqələrinə çağıran A.İmaməliyev son illərdə ölkəmizdə aparılan uğurlu iqtisadi-sosial inkişaf siyasətindən danışıb. A.İmaməliyev YAP-ın bu inkişaf prosesinə mühüm dəstək verdiyini bildirib. Onun sözlərinə görə, bu gün ölkəmizdə həyata keçirilən siyasi kurs vətəndaşlarımızın sosial rifahının yüksəlişinə istiqamətlənib. 
Çıxış edən YAP-ın Milli Məclis seçkilərində namizədi Tahir Mirkişili ölkəmizdə sahibkarlığın inkişafı istiqamətində atılan addımlardan bəhs edib: "Ölkəmizdə kiçik və orta sahibkarlığın inkişafı yönündə mühüm addımlar atılır. Lisenziyaların "ASAN xidmət” tərəfindən verilməsi bürokratik əngəllərin aradan qalxmasına yol açacaq. Bu yeniliklər Azərbaycan iqtisadiyyatının yeni mərhələyə qədəm qoymasını şərtləndirir. Bu gün ölkəmizdə kiçik və orta sahibkarlığın inkişafı birbaşa cənab Prezidentimizin diqqətindədir. Mən inanıram ki, noyabrın 1-də seçicilərimiz ölkəmizin inkişaf yolunda hər zaman Prezidentimizin siyasi kursunu dəstəkləyən YAP-ın namizədlərinə səs verəcəklər”. 
Daha sonra YAP-ın namizədi seçiciləri maraqlandıran sualları cavablandırıb.(yeniazerbaycan.com)