Ermənistan prezidenti Serj Sarkisyan xarici işlər naziri Edvard Nalbadyanın rəhbərlik etdiyi nümayəndə heyətini Dağlıq Qarabağa, Xankəndinə göndərib. 

ANS PRESS-in məlumatına görə, qondarma Dağlıq Qarabağ respublikasının prezidenti Bako Saakyan Ermənistan XİN-in mərkəzi aparatının bütün rəhbər heyəti, habelə diplomatik korpusun nümayəndələrini qəbil edib. 

Bu gün səhər saatlarında keçirilən görüşdə Dağlıq Qarabağ münaqişəsinin həlli, bölgənin təhlükəsizliyi və sosial-iqtisadi inkişafı ilə bağlı məsələlər müzakirə edilib.

Eyni zamanda tərəflər Ermənistan və Dağlıq Qarabağın xarici siyasət idarələri arasında qarşılıqlı təsir məsələlərini və xarici ölkələrdə fəaliyyət göstərən Ermənistan səfirlikləri və qondarma Dağlıq Qarabağ respublikasının daimi nümayəndəliklərinin işi müzakirə edib.

Geniştərkibli görüşdən sonra Edvard Nalbadyan və Bako Saakyan təkbətək görüş keçirib.

Qeyd edək ki, Avrasiya İqtisadi İttifaqının yaradılması ilə bağlı Astanada keçirilən görüşdən sonra Ermənistan XİN-in mərkəzi aparatının bütün rəhbər heyəti Dağlıq Qarabğa göndərilməsi təsadüfi deyil. Çünki bu görüşdə Ermənistan prezidenti çətin vəziyyətə düşmüşdü. Belə ki, Azərbaycan prezident İlham Əliyev məktub göndərmişdi. Qazaxıstan prezidenti Nursultan Nazarbayev məktubu oxuyan zaman Serj Sarkisyan və xarici işlər naziri Edvard Nalbandyan təşvişə düşmüşdü.

Məktubda deyilirdi ki, Ermənistan Avrasiya İqtisadi İttifaqına ancaq indiki sərhədləri çərçivəsində daxil ola bilər.

Qazaxıstan prezidenti Nursultan Nazarbayev toplantıda demişdi: "Biz Azərbaycan prezidentinin məktubunu almışıq. Bütün prezidentlər alıb. Ermənistan Ümumdünya Ticarət Təşkilatına BMT tərəfindən tanınmış beynəlxalq sərhədləri çərçivəsində üzv qəbul olunub və indi də qaydalar Ermənistan ərazisinə bu prinsiplə şamil edilməlidir”. 

Onu da bildirək ki, Serj Sarkisyanın görüşdə səsləndirilən fikirlərə etiraz etməməsi və Ermənistana kədərli qayıtması ölkədə ictimai-siyasi xadimlərin etirazına səbəb olub.