Azərbaycanın Biləsuvar Gömrük İdarəsinin "Qoşa Təpə” gömrük postunda Azərbaycan və İran gömrükçüləri arasında gömrük və sərhəd məsələləri ilə əlaqədar növbəti görüş keçirilib.

Dövlət Gömrük Komitəsindən (DGK) verilən məlumata görə, görüş Azərbaycan Respublikası Dövlət Gömrük Komitəsi və İran Mərkəzi Gömrük İdarəsi arasında imzalanmış anlaşma memorandumunun müddəalarına müvafiq olaraq gerçəkləşib.

Görüşdə Azərbaycanı DGK-nın Biləsuvar Gömrük İdarəsinin rəisi Sahib Axundovun, İranı isə Biləsuvar Gömrük İdarəsinin rəisi Siyavuş Surinin rəhbərlik etdikləri nümayəndə heyətləri təmsil edib.

Görüşdə Azərbaycan və İran gömrük-sərhəd buraxılış məntəqələri arasında cari məsələlərlə bağlı fikir mübadiləsi aparılıb. Tərəflər fiziki şəxslərin gediş-gəlişi zamanı yaranan çətinliklərin aradan qaldırılmağı, müəyyən olunmuş normalar əsasında əl yüklərinin buraxılmağı məsələlərinə toxunublar.

Bundan başqa, görüşdə 24 saatlıq iş rejiminə keçid, Naxçıvan Muxtar Respublikasından gələn nəqliyyat vasitələrinin yanacaq çənlərinə tətbiq olunan cərimələr və bir sıra digər məsələlərin ətraflı müzakirəsdi aparılıb.

S.Suri 24 saatlıq iş rejiminə keçmək üçün artıq yekun işlərin görüldüyünü və Novruz bayramından sonra bu birgə fəaliyyətin gerçəkləşəcəyinə əminliyini ifadə edib.  (salamnews.org)