"Kaspersky Lab” antivirus labaratoriyası daha bir sensasion məlumatla çıxış edib.
Laboratoriyanın əməkdaşları dünyanın 30 ölkəsində işləyən unikal casus proqramını üzə çıxarıblar.
Bu virus "Seagate”, "Western Digital”, "Toshiba” və digər aparıcı sərt diks istehsalçılarının qurğularında özünə yer edib və dünyanın əksər kompüterlərindəki informasiyaya çıxış imkanı olub.
Araşdırma nəticəsində bu casus proqramını idarə edən hakerlərin ABŞ Milli Kəşfiyyat Agentliyinə bağlı olduğu üzə çıxıb. Həmçinin casus proqramının ABŞ və İsrailin İranın nüvə obyektlərini sıradan çıxaran "Stuxnet” virus proqramına bağlılığı var.
Laboratoriya müəyyən edib ki, bu casus proqramı dünyanın 30 ölkəsinin kompüterlərində özünə yer edib. Virusa yoluxmuş kompüterlərin çoxu İrandadır. Növbəti yerdə Rusiya, Pakistan, Əfqanıstan, Çin, Mali, Suriya, Yəmən, Əlcəzair gəlir.
Hakerlərin hədəfi hökumət strukturları, energetika şirkətləri, banklar, nüvə araşdırmaları ilə bağlı olan mütəxəssislər, KİV nümayəndələri və islamçı fəallar olub.
Milli Təhlükəsizlik Agentliyinin keçmiş əməkdaşı "Röyter”ə bildirib ki, "Kaspersky Lab” tərəfindən aşkar olunmuş casus proqramı doğrudan da onlara məxsusdur. Onun sözlərinə görə, Amerika xüsusi xidmətləri bu virus proqramına "Stuxnet” qədər əhəmiyyət verirlər.
Digər keçmiş əməkdaş da vaxtilə sərt dikslər üçün casus proqramları hazırladıqlarını, ancaq onun təyinatı barədə bilmədiklərini deyib.
"Kaspersky Lab” bildirir ki, bu virus proqramı əsl texnoloji sıçrayış yaradıb, öz-özünə sərt dikslərin proqram təminatnı yeniləyib və nəticədə hakerlər kompüterlərin sərt dikslərinin format edilməsi halında da ona nəzarət etmək imkanında olublar.
Araşdırma göstərib ki, virus proqramı praktiki olaraq bütün əsas sərt disk istehsalçılarının məhsullarına müdaxilə edib. Hərçənd ki, aparıcı sərt disk istehsalçıları bundan xəbərsiz olduqlarını deyiblər.
Xatırladaq ki, ötən həftə sonu "Kaspersky Lab” daha bir sensasion məlumatla çıxış edərək dünyanın ən iri kibercinahyətinin üstünü açdığını bildirmişdi. Məlum olmuşdu ki, hakerlər dünyanın 30-dan çox ölkəsində 100-dən çox bankın əməliyyat sisteminə xüsusi virus yerləşdirərək iki il ərzində 1 milyard dollardan çox vəsait oğurlaya biliblər. (virtualaz.org)
Xəbərdən istifadə edərkən istinad etmək vacibdir.
