Ukraynanın cənub-şərqində hərbi əməliyyatlar başladıqdan sonra uzun illər bu torpaqlarda yaşayan azərbaycanlılar da istər-istəməz tərəf seçməyə və döyüşlərdə iştirak etməyə başladılar. Əminliklə demək olar ki, Ukrayna azərbaycanlılarının mütləq əksəriyyəti rəsmi Kiyevi dəstəkləyirlər. Bu gün Ukrayna ordusunun və könüllü batalyonlarının tərkibində yüzlərlə azərbaycanlı döyüşçü var. Belə soydaşlarımızdan biri Tağı Cəfərovdur.
Tağı Cəfərov sosial şəbəkələrdəki səhifələrində Ukraynadakı hərbi əmliyyatlarda aktiv iştirak etməsini sübut edən fotolar paylaşır.
1954-cü il noyabrın 3-də Bakıda anadan olan Cəfərov Azərbaycan Mədəniyyət və İncəsənət İnstitutunda təhsil alıb. O, 1988-ci ildə institutu bitirib və Ukraynaya köçüb. Uzun illər Dneprpetrovsk şəhərində yaşayıb və fotoqraf kimi çalışıb.
Ukraynanın şərqində 2014-cü ilin yazında baş qaldıran separatçı hərəkat Tağı Cəfərovun Ukraynanın ərazi bütövlüyü uğrunda müharibəyə qoşulmasına səbəb olub. Hazırda 60 yaşlı soydaşımız könüllülərdən ibarət və Ali Radanın deputatı Semyon Semyonçenkonun başçılıq etdiyi "Donbas” xüsusi təyinatlı batalyonunda xidmət edir. Tağı Cəfərov xidmət müddətində Artomyovsk, Debaltsevo, Loginovo və Mariupol istiqamətlərində baş verən döyüşlərdə aktiv iştirak edib. (modern.az)
Xəbərdən istifadə edərkən istinad etmək vacibdir.