Fevralın 12-də Bakıda "Cənub Qaz Dəhlizi" layihəsinin həyata keçirilməsi üçün cəlb edilmiş ölkələrin energetika nazirlərindən ibarət Məşvərət Şurasının ilk iclası keçirilib. İclasda "Cənub Qaz Dəhlizi" layihəsinin icrası, idarə olunması, mövcud vəziyyəti ilə bağlı konkret tövsiyələr verilib. Məşvərət Şurasının iclasında "Cənub Qaz Dəhlizi" layihəsinin iştirakçısı olan ölkələrin - Azərbaycan, Türkiyə, Gürcüstan, Yunanıstan, Albaniya, İtaliya və Bolqarıstanın energetika nazirlərinin rəhbərlik etdiyi nümayəndə heyətləri, Avropa Komissiyasının enerji məsələləri üzrə vitse-prezidenti, Beynəlxalq Maliyyə Korporasiyasının, Avropa Yenidənqurma və İnkişaf Bankının, Azərbaycan Respublikası Dövlət Neft Şirkəti, "BP-Azərbaycan" şirkəti, Transanadolu Boru Kəməri (TANAP), Transadriatik Boru Kəməri (TAP) şirkətlərinin və digər beynəlxalq qurumların rəsmi nümayəndələri iştirak ediblər. Məşvərət Şurasının iclasın keçirilməsi ilə "Cənub Qaz Dəhlizi" layihəsinin həyata keçirilməsi istiqamətində artıq əsas işlərin görülməsinə başlanılıb. "Cənub Qaz Dəhlizi" "Əsrin müqaviləsinin məntiqi nəticəsidir" "Cənub Qaz Dəhlizi" layihəsinə və fevralın 12-də Bakıda keçirilən iclasa münasibət bildirən Yeni Azərbaycan Partiyası Siyasi Şurasının üzvü, partiyanın iqtisadi məsələlər komissiyasının sədr müavini Aydın Hüseynov deyib ki, 1994-cü il sentyabrın 20-də "Əsrin müqaviləsi" ilə uğurlu və olduqca mühüm bir tarixi başlanğıca imza atan Azərbaycan dövləti bu ənənəni davam etdirərək hazırda XXI əsrin mühüm siyasi-iqtisadi hadisəsi - "Cənub Qaz Dəhlizi" layihəsi ilə bağlı təşəbbüs həyata keçirir. Onun sözlərinə görə, bu saziş Xəzər dənizindən Avropa İttifaqına birbaşa xüsusi keçid rolunu oynayacaq: "Cənub Qaz Dəhlizi" layihəsinin həyata keçirilməsi üçün cəlb edilmiş ölkələrin energetika nazirlərindən ibarət Məşvərət Şurasının ilk iclasının keçirilməsi Ümummilli Lider Heydər Əliyev tərəfindən əsası qoyulmuş yeni neft strategiyası və "Əsrin müqaviləsi"nin məntiqi nəticəsidir. Azərbaycan 21 il əvvəl çox mühüm bir tarixi hadisəyə imza atmaqla regionda Qərb yönümlü enerji marşrutları sisteminin əsasını qoyub. Bundan sonra regionda çox strateji əhəmiyyətə malik transenerji dəhlizləri ilə bağlı sazişlər imzalanıb". "Əsas siyasi qətiyyət və prinsipial qərar İlham Əliyevə məxsusdur" A.Hüseynov bildirib ki, Milli Liderin layiqli davamçısı Prezident İlham Əliyevin əzmkarlığı, siyasi qətiyyəti və təşəbbüsü sayəsində ötən illər ərzində Azərbaycan yeni neft və qaz layihələrinin həyata keçirilməsinə nail olub: "Cənab İlham Əliyevin uzaqgörənliklə atdığı addımlar regionun enerji xəritəsinin dəyişməsinə səbəb olub və Azərbaycanın müəllifi olduğu yeni enerji dəhlizlərinin coğrafi hüdudları genişlənməkdədir. "Cənub Qaz Dəhlizi" layihəsinin reallaşmasında əsas siyasi qətiyyət və prinsipial qərar məhz Azərbaycanın dövlət başçısı İlham Əliyevə məxsusdur. Hələ 2011-ci ilin yanvar ayında Avropa Komissiyasının o vaxtkı sədri Xose Manuel Barrozunun Bakıya səfəri zamanı Avropa İttifaqı ilə Azərbaycan arasında "Cənub Qaz Dəhlizi"nə dair Anlaşma Memorandumu imzalandı və bu qərar hazırkı enerji layihəsinin həyata vəsiqə almasında açar rolunu oynadı. Bu marşrutu seçməklə Azərbaycan özünün Avropanın enerji təchizatçısına çevrilməsi üçün mühüm addımlardan birini atdı". "TANAP və TAP ən rentabelli layihələrdir" YAP Siyasi Şurasının üzvü deyib ki, "Cənub Qaz Dəhlizi" Bakı-Tbilisi-Ərzurum kəmərinin genişləndirilməsini, Trans-Anadolu Boru Kəmərinin (TANAP) inşasını, bu kəmərin məntiqi davamı olan Trans-Adriatik Boru Kəməri (TAP) layihəsinin tikintisini və ümumilikdə bu layihələrin icrası nəticəsində Xəzər qazının Avropaya nəqlini nəzərdə tutur: "TANAP layihəsinə əsasən, Azərbaycan yaxın 2-3 ildə Yunanıstan, Bolqarıstan və Albaniyaya qaz nəql edəcək. Bu ölkələrə mavi yanacaq "Şahdəniz-2" layihəsi çərçivəsində nəql olunacaq. TANAP "Cənub Qaz Dəhlizi" layihəsinin ən mühüm komponentlərindən biri olmaqla yeni dəhlizlərin yaradılmasına geniş üfüqlər açıb. "Cənub Qaz Dəhlizi" layihəsinin ən həlledici mərhələsi isə TAP layihəsinin işə düşməsi olacaq. TAP "Şahdəniz-2" layihəsi çərçivəsində hasil ediləcək təbii qazın Qərbə nəqli üçün ən rentabelli, təhlükəsizlik, səmərəlilik və kommersiyaya baxımından düzgün və yaxşı seçilmiş boru kəməridir. TAP "Şahdəniz", "Ümid", "Abşeron", "Alov", "İnam" və digər zəngin qaz yataqlarının uzunmüddətli, bir neçə onilliklər ərzində Avropaya nəqlinə imkan verən ən strateji nəhəng kommunikasiya infrastrukturu deməkdir. Uzunluğu 870 km olacaq TAP kəməri Azərbaycan qazını Türkiyə, Yunanıstan, Albaniya ərazisi ilə İtaliyaya çatdıracaq. Qazın Yunanıstandan digər kommunikasiya infrastrukturları vasitəsilə Bolqarıstana, eləcə də Adriatik dənizindən çoxşəbəkəli sistemlər vasitəsilə Bosniya və Hersoqovinaya, Xorvatiyaya, Serbiyaya, Çernoqoriyaya çatdırılması nəzərdə tutulur. Ümumilikdə, TAP vasitəsilə Şərqi Avropa regionu ölkələri qazla təmin olunacaq". A.Hüseynovun sözlərinə görə, "Cənub Qaz Dəhlizi" layihəsi Xəzər regionunun digər ölkələri üçün geniş əməkdaşlığa çox yaxşı fürsət yaradır: "Yaxın illərdə Türkmənistan və Qazaxıstanın öz yanacaq ehtiyatlarını bu dəhlizlə nəql etməsi istisna deyil. Yəni, bu dəhlizlə Avropaya 5-dən çox ölkənin qaz ehtiyatlarını nəql etmək olar. Çünki bu ölkələr üçün hər bir baxımdan - istər siyasi, istər iqtisadi və kommersiya cəhətdən "Cənub Qaz Dəhlizi" daha sərfəli və təhlükəsiz sayıla bilər". "Bu dəhlizin yaradılması Avropa üçün çox vacibdir" "Cənub Qaz Dəhlizi" layihəsinin əhəmiyyəti barədə danışan Milli Məclisin deputatı Tahir Rzayev isə deyib ki, bu layihənin həyata keçirilməsi Avropada enerji təhlükəsizliyinin təmin edilməsi baxımından çox vacibdir. Onun sözlərinə görə, Azərbaycan bu gün artıq dünyanın bir çox ölkələrini enerji ilə təmin edən dövlətə çevrilir. Deputat hesab edir ki, bu dəhlizin yaradılması nəinki Azərbaycan, eləcə də qonşu ölkələr, Avropa üçün çox zəruridir: "Bu sahənin mütəxəssisləri də çox düzgün olaraq qeyd edirlər ki, "Cənub Qaz Dəhlizi" layihəsi Azərbaycanla bərabər Avropanın bir çox ölkələrinin, eləcə də Ermənistan istisna olmaqla qonşu dövlətlərin qazla təminatında mühüm rol oynayacaq. Ona görə "Cənub Qaz Dəhlizi" çox vacibdir. Azərbaycan Prezidenti dəfələrlə öz çıxışlarında bu layihənin vacibliyini, əhəmiyyətini qeyd edib". T.Rzayev bəzi qüvvələrin bu dəhlizin yaradılmasına kölgə salmaq cəhdlərindən də danışıb: "Təəssüflər olsun ki, Azərbaycanın inkişafına qısqanclıqla yanaşan müəyyən qüvvələr bu dəhlizin yaradılmasına da kölgə salmaq istəyirlər. Ancaq əvvəlki neft kəmərlərinin, qaz layihələrinin həyata keçirilməsində də Azərbaycana belə təsirlərin olduğunu hər birimiz yaxşı xatırlayırıq. Ona görə əminəm ki, bu layihənin həyata keçirilməsi mümkün olacaq, çünki bu, Azərbaycan, Avropa üçün əhəmiyyətlidir". (teleqraf.com)
Xəbərdən istifadə edərkən istinad etmək vacibdir.