İtaliyaya işgüzar səfəri çərçivəsində Prezident İlham Əliyev "The European House – Ambrosetti” beyin mərkəzi tərəfindən İtaliyanın Çernobbio şəhərində hər il keçirilən beynəlxalq forumda əsas qonaq kimi iştirak edib. Sayca 48-ci olan budəfəki forumun əsas plenar iclasında Prezident İlham Əliyev "Enerji təhlükəsizliyinin təmin olunmasında Azərbaycanın rolu” mövzusunda çıxış edib. Dövlət başçısının çıxışının mühüm tərkib hissəsini Azərbaycan – İtaliya arasında qarşılıqlı münasibətlər və Azərbaycan həqiqətlərini işıqlandırmaq təşkil edirdi. 

Qeyd etmək lazımdır ki, İtaliya - Azərbaycan tərəfdaşlığı gələcəyə yönəlmiş, qlobal və regional proseslərə, problemlərə ümumi baxış, habelə tərəflərin mövcud maraq və nüfuz dairəsinə düşən bölgələrdə sülh, sabitlik və rifahı inkişaf etdirmək üçün ortaq bir hədəfə istiqamətlənən əməkdaşlıqdır.

Prezident İlham Əliyev İtaliya ilə Azərbaycan arasında strateji tərəfdaşlıq səviyyəsində çox yaxşı əlaqələrin qurulduğunu və qarşılıqlı ticarət dövriyyəsinin davamlı sürətdə artdığını, enerji sahəsində uğurlu əməkdaşlığın həyata keçirildiyini vurğulayıb.

Forumda çıxışı zamanı Prezident İlham Əliyev Azərbaycanın heç bir zaman özünü nəhəng qonşuların siyasətinə uyğunlaşdırmadığını forum iştirakçılarının nəzərinə çatdırıb. Xüsusi vurğulanıb ki, Azərbaycanın beynəlxalq hüquq, ədalət prinsiplərinə əsaslanan , müstəqil siyasəti var. Prezident Forumda Azərbaycan xalqının artıq 30 ildir ki, müstəqil olduqlarını və əbədi olaraq müstəqil yaşamaq istədiklərini bəyan edib. Ölkə Prezidentinin bu fikirləri dünyada baş verən proseslərdə Azərbaycanın tərəfsiz qalması və yaşanan münaqişələrdə maraqlı tərəf olmadığı kimi də qiymətləndirilə bilər. Çünki dünya fevraldan əvvəl olduğu vəziyyətdə heç vaxt olmayacaq və proseslərin hansı axınla gedəcəyi, Ukraynada müharibənin nə qədər müddət davam edəcəyi və savaşın sonunun necə bitəcəyi, dünyadakı güclərin balansının hansı şəkildə olacağı kimi amillərdən asılıdır. Dövlət başçımız Azərbaycana qarşı beynəlxalq hüququn prinsiplərinin həm də bu platforma vasitəsilə uzun illərdir pozulmasını da xatırlatdı. Azərbaycanın 30 il boyunca müharibə və işğalla üzləşmiş, beynəlxalq hüquq normalarının pozulmasından əziyyət çəkmiş ölkə olduğunu qeyd eden Dövlət başçısı, dünyada və regionda mövcud geosiyasi vəziyyət fonunda Azərbaycan öz siyasətini milli maraqlar və beynəlxalq hüququn prinsipləri əsasında qurduğu bir daha beynəlxalq ictimaiyyətin diqqətinə çatdırdı.

Nigar Qocayeva
YAP Sumqayıt şəhər təşkilatının məsləhətçisi