İranın dövlət radiosu olan "Təbriz radiosu”nun azərbaycan dilində yayımında Azərbaycanın Vaşinqtondakı səfiri Elin Süleymanov təhqir edilib.
Bu haqda israilli professor və araşdırmaçı Aleksandr Murinson dailycaller.com portalında yer alan məqaləsində yazıb.
"Görünür, vəziyyət İran və Rusiyanın Qafqazdakı sevimli ölkəsi Ermənistan üçün o qədər pisdir ki, İslam Respublikasının rəsmi radiosu Ermənistanı müdafiə edən hesabat yaymalı olub. Azərbaycanın ABŞ-dakı diplomatik fəallığından narahat olan İran rəsmi təbliğatçıları sən demə, Ermənistanın öz siyasətinin girovuna çevrildiyi və Azərbaycan ərazilərinin işğalına, Türkiyə ilə düşmənçiliyə görə ziyan çəkdiyinə dair bəyanatları özlərinə təhqir hesab ediblər” - deyə A.Murinson yazır.
Məqalədə bildirilir ki, "Təbriz radiosu”nun efirində Ermənistan barədə bu bəyanatları səsləndirən Azərbaycan səfiri Elin Süleymanova hücum edilib, onu "yəhudi siyasətçi və Azərbaycan hakimiyyətində sionist rejimin maraqlarının müdafiəçisi” adlandırıblar.
Həmçinin İran radiosunda bildiriblər ki, rəsmi Bakının Ermənistan barədə ABŞ-da səsləndirdiyi bu tənqidlər "sübutlara və dəlillərə söykənmir”.
Radio iddia edir ki, "yəhudi siyasətçi Amerika və sionist rejimin maraqları naminə əlindən gələni edir, Azərbaycan xalqı və dövlətinə xidmət etmir”.
Elin Süleymanovun İran radiosunda nə vaxt tənqid edildiyi göstərilmir.
A.Murinson xatırladır ki, səfir Elin Süleymanov Amerikadakı yəhudi təşkilatlarının konfranslarında və digər tədbirlərində müntəzəm iştirak edir. Öz çıxışlarında Ermənistanın Azərbaycan ərazilərinin 20 faizini işğal altında saxlaması, Xocalıda soyqırımı törətməsi və digər faktları çatdırır. (Virtualaz.org)
Xəbərdən istifadə edərkən istinad etmək vacibdir.