Xatirə İbrahimova ömrünün 48 ilini gənc nəslin vətənpərvər və savadlı böyüməsinə həsr edib. Onlarla alim, həkim, neçə-neçə sənət adamı yetişdirib. İsti nəvazişiylə yüzlərlə insana elm verən Xatirə müəllimin bu gün özünün istiliyə ehtiyacı var. Sumqayit şəhər 36-cı məhəllədə yaşayan Xatirə xanımın mənzilində istilik yoxdur. Xatirə xanım binalarına istilik sisteminin çəkiləcəyi günü səbirsizliklə gözləyir. Müraciət etdiyi qurumdan isə ona səbr etməyi məsləhət görüblər. Bu təkcə Xatirə İbrahimovanın deyil, həm də şəhərin mərkəzində yerləşən 11 yaşayış binasından ibarət olan 36-cı məhəllənin sakinlərinin üzləşdiyi problemdir. Bura Sumqayıtın nümunəvi məhəllələrindən sayılsa da istilik sisteminin olmaması bu fikri alt-üst edir. Məhəllə sakini Raya Cəbiyevanı isə narahat edən ən ciddi məsələ azyaşlı uşaqların şəraitsizlik ucbatından tez-tez xəstələnməsidir. Onun sözlərinə görə, qazanclarının yarısından çoxu dəva-dərmanlara gədir. Məsələ ilə bağlı üz tutduq "Sumqayıtistiliktəchizatı” İdarəsinə. Qurumun rəisi Aftandil Nuriyev bildirdi ki, hazırda şəhərdə 240 yaşayış binası istiliklə təchiz olnur. Proses mərhələli şəkildə aparıldığından bütün mənzillər istiliyi yalnız 2018-ci ildə ala biləcək. Yəqin ki, 36-cı məhəllə sakinləri idarə rəisinin dediklərini eşitdilər. Odur ki, problemin həlli üçün iki il də gözləməli olacaqlar.
RAMİL ZEYNALLI

Xəbərdən istifadə edərkən istinad etmək vacibdir.