… Onun haqqında nəsə yazmaq bir qədər çətindi. Çünki, o, sıradan biri deyil. Mütləq əksəriyyətin edə bilmədiyin o bacarıb. 3 dəfə Avropa, 3 dəfə Dünya Çempionatında himnimizi səsləndirib, bayrağımızı yüksəklərə qaldırıb. Söhbət karatenin Goju-Ryu növü üzrə milli yığmanın üzvü 7 qat Azərbaycan, 3 qat Avropa, 3 qat  Dünya Çempionu Fərid Əzizovdan gedir.  Həmsöhbətimizin 32 yaşı var. Balıqlar bürcündəndir, Boyu 1,85 metr, çəkisi 75 kilodur.  Ailəlidir. 2 övladı var. 
- Xoş gördük, Fərid bəy. 
- Xoş gördük.
- İlk yarış və ilk qalibiyyətiniz..
- Uşaqlıqdan 93-cü ildən məşq eliyirəm. Hardasa 7-8 yaşında ilk dəfə respublika çempionatına çıxmışam. 3-cü yeri tutdum o vaxt. Mənim üçün fəxr idi. Yaşıdlarım arasında seçilib 3 cü yeri qazanmışdım. Uşaq vaxtı gedəndə çəki və yaşa görə olur. İnsan gedir 4-5 dənə döyüş keçirir. 5 döyüşdən  3-cü yerə çıxmaq nailiyyətdir və evə gələndə düzdür adam gömgöy gəlir. Adam döyülür, zərbələr dəyir.  Gələndə ailəyə medalı utana-utana da olsa göstərirsən ki,  3-cü yeri tutmuşam. 
- Ən ağır döyüşünüz hansı olub ? Necə xatırlıyırsınız o döyüşü ?
- Mənim üçün ən ağır döyüşüm 2016-cı ildə Rusyanın Pyatıqorskı şəhərində keçirilən Kempo-Karate üzrə Dünya Çempionatı oldu, həmin vaxt mən həm Respublika çempionatında iştirak edirdim, həm də Dünya Çempionatına lisenziyam var idi. Respublika Çempionatında final görüşündə zədələnmişdim zədəmin sağalmasını gözləmədən Dünya Çempionatına yollandım. Ağır zədəmə baxmayaraq 2016-cı ilin ən yaxşılarından biri olaraq çempionatın ilk pilləsinə qalxdım himnimizi səsləndirdim bayrağımızı ucaltdım. Bu, mənim üçün ən ağır yarışım oldu. Çünki bir ayda iki çempionatda iştirak etdim və hər ikisində də fəxri kürsünün ilk pilləsinə qalxdım.
- Fərid bəy, insanda hansı keyfiyyəti dəyərlındirirsiz ?
- Hər insan fərqlidir və fərqli düşüncəyə, fərqli xasiyyətə malikdir. Mənim üçün ən keyfiyyətli insan vətənini sevən, yoldaşlığa dəyər verən insan ən keyfiyyətli insandır. İnsan idmanda udar da, uduzar da amma vətənin bayrağını ucaltmaq üçün idmançı var gücü ilə çalışmalıdır və bacardığından da artığını ortaya qoymalıdır.
- Dediniz Vətəni sevən insanları dəyərləndirirəm. Sizdə vətənə sonsuz sevgi var. 
- Bəli, Vətənimi, millətimi çox sevirəm. Uşaqlıqdan idmanla məşğulam. Həmişə səy göstərmişəm ki, daha da güclü olum. Enerjim çox olsun ki, nə vaxtsa düşmənlərimizlə üzbəüz gələndə zəiflik göstərməyim. Bayrağımızı, millətimizin adını yüksəklərə qaldırım. Hər dəfə çempionatlarda bayrağımız qalxanda qürurlanıram. Fəxarət duyuram. Bu başqa hissdir.   
- Bəs nəyi sevmirsiz, sizi nə əsəbləşdirir ? 
- Özünü sevən, özünü başqalarından üstün tutan insanı sevmirəm.Təkəbbürlü dikbaş insan görəndə əsəbləşirəm.
- İndiyə qədər nəyə təəssüflənmisiniz?
- Yadıma gəlmir. İstər respublika, istər beynəlxalq yarışlarda 1-ci yeri qazanmışam. Qismətdir nədirsə, hər dəfə gedəndə 1-ci yerlə qayıtmışam. Avropa olsun, Dünya çempionatı olsun. 2-ci yer mənlik deyil. 
- Fərid bəy, oğlunuzun yolunuzu davam etdirməsinə razılıq verərsiniz? Çünki, bu pilləyə çatmaq asan başa gəlməyib sizə. Böyük zəhmət, səbr tələb edir. 
- Bəli mənin üçün ən böyük şərəf olar ki mənim oğlum Abdullah Əzizov da vətənini sevən biri ola və o da atası kimi Azərbaycan bayrağını yarışlarda ən uca pilləyə qaldıra. Məncə ata üçün bundan böyük fəxr ola bilməz. Oğlumda da idmana böyük həvəs var. Hər yarışdan gələndə məni o qarşılayır və "ata mənim medalım hanı?” deyir.
- Döyüş meydanında sərt olan Fərid Əzizov həyatda necədir ?
- Fərid həyatda çox sakit gülərüz zarafatçıl biridir. Mehriban ailə başçısıdır. Uşaqlarına qarşı çox qayğıkeş, dostu yolunda canını qurban verən biridir.
- Dəfələrlər Avropa və dünya çempionatında qalib olmusunuz. İndi əsas hədəfiniz nədir?  
- İstəyimə çatmışam. Hədəfim budur ki, bundan sonrakı yarışlarda da yenə gedib iştirak edib Azərbaycanın bayrağın nə qədər gücüm var, özümdə iradə hiss edirəm qalib gələm. Hədəfim birdir. Bayrağımızı digər bayraqlardan üstün tutmaq. Bir hadisəni deyim. Bu il yarışda yer tutduq. Sonda hər çəkidən olan idmançılar xatirə şəkili çəkdirirdi. Bizim düşmənlərimiz də yanımızda idi. Uşaqdan xahiş etdim ki, gəl çıx boynuma bayrağımızı qaldır. Bizim bayraq düşmənimizin bayrağından yüksəkdə olmalıdır. Bayraqlarımızın eyni hündürlükdə olmasını özümə sığışdırmadım. Mən göstərməliyəm ki, mən azərbaycanlıyam. 
-  Qarşıda hansı yarışlarınız var?
- Ümumdünya Qoju-ryu Federasiyasının prezidenti Nakamuro Tetsukiiyunun 23-dən 27-nə kimi Azərbaycanda olacaq. Seçilən idmançılar üçün təlim-məşq keçəcək. Orda mən də iştirak edəcəm inşallah. Avqustun ortalarında Batumidə Avropa Çempionatı olacaq. Allah nəsib etsə, ora gedəcəm lisenziyam var. Bu ilin dekabrında Rusiyada Kempo-Karatedən yenə də Dünya Çempionatı olmalıdır. Hazırda özünümüdafiə-daha doğrusu tərksilah fəndi üzərində işləyirəm. Yavaş-yavaş tərkisilah növünün sirlərini öyrənirəm və məqdəsədim bu növü mükəmməl öyrənib, tanıdığım hər kəsə onu öyrədim.  
- Harda işləyirsiniz, yəni ailəni necə dolandırırsınız? 
- Şükür Allaha yaxşıdır hər şey. Heydər Əliyev adına Beynəlxalq Hava Limanında Aviasiya Təhlüksizliyi Baş Idarəsində işləyirəm. İdarənin rəhbəri Cənab Elxan Orucova təşəkkürümü bildirirəm ki mənim yarışlarda iştirak etməyimə şərait yaradır.Maaşımı ordan alıram. Sağ olsunlar. Ailəm də mənim kimi vətənini sevən insanlardır bu idmana qazanc gözü ilə baxmırlar. Daim mənə motivasiya verirlər, daim qələbələrə səsləyirlər. Hər uğurumda 50 faiz mənim gücüm dayanırsa, 50 faiz də ailəmin dəstəyi var.Onların dəstəyi sayəsində bu zirvəyə ucalmışam.
- Hər bir uğurlu idmançının bir məşqçisi var. Ona dəstək olub, öyrədir yarışlara hazırlayır. Fərid Əzizov bu qədər uğura görə kimə təşəkkür edir.
Doğrudur hər bir idmançının öz məşqçisi var. Ona dəstək olur çətin anlarda onun yanında olur idmançıya idmanın sirlərini öyrədir qalib olmasında bilavastə əməyi olur. Mən də təşəkkür edirəm Goju-Ryu Okinava Karate-Do Federasiyasının rəhbərinə Tarverdi Allahverdiyevə və məşqçim Pərviz Hüseynova. Məhz bu iki insanın sayəsində indi olduğum məqamdayam. Pərviz Hüseynovun səylərinin sayəsində onun mənim üzərimdə olan zəhməti əməyi sayəsində qalibliyə yüksəlirəm. Pərviz mənim üçün zalda amansız məşqçi, zaldan kənarda sirdaş, yarışlara yola düşəndə isə mükəmməl yoldaş olur. Onunla 3 dünya çempionluğu qazanmışıq, inanıram ki, bundan sonra da Tarverdi Allahverdiyev və Pərviz Hüseynovun sayəsində neçə-neçə yarışlarda uğurla iştirak edib, vətənə birinciliklə qayıdacayıq.
- İnşallah. Biz buna inanırıq. Uğurların uğurlarına calansın.
- Təşəkkür edirəm.

Xəbərdən istifadə edərkən istinad etmək vacibdir.